Spanish champion Real Madrid in UEFA Champions League chanchin a club ropui ber an nihna chhan an lantir leh a. Round of 16 leh quarter-final ang thovin tla tur dinhmunah an ding a, mahse tho lehin Manchester City an paih thla.
Nilaini zana Santiago Bernabeu a inkhelah Manchester City chu Champions League chanchin a chetsualna lian zinga chhiar tel tawh turin a chesual a. Dinhmun tha zawk hum thei lovin 3-1 in an tlawm a, 6-5 aggregate in an tla.
Hmuh hmaih thiang lo Blancos
First leg-ah Manchester City in an mualah 4-3 in hnehna an chang a. Second half a Riyad Mahrez-a’n goal a khung hmangin minute 90-naah goal hnihin hma an hruai a. Final khel turin ke an pen lut tawh.
Mahse an lakah Rodrygo Goes a inlar. Brazilian rawlthar substitute hian veilam atanga Real chhandamtu ni fo Karim Benzema ball siamsak chu goal-ah a khung a. Hei hi Real in goal zawna shot an neih hmasak ber a ni.
Second 90 a liam lehin Real an lawm leh a. Rodrygo bawk an lawmna ni lehin Dani Carvajal ball cross chu Marco Asensio chuan a zawnah a thai a, ani in a tauh lut.
Tla tur atanga an thawh leh avangin Bernabeu thawm a ring a, rilru inbeihnaah Real an che tha leh ta zawk a, City barakhaih in an awm.
Extra-time khelh hma in chak theihna hun an nei ve ve a, Rodrygo-a’n hattrick siam theihna hun a nei a, Phil Foden-a’n lehlamah penalty area chhung atangin goal chungah a pet.
Extra-time ah Real in goal pawimawh an khung. Benzema chuan Ruben Dias tlan khalhin ball a la a, City defender in foul in penalty a chawi. France striker in tun season a a goal 43-na a khung a. Real chakpuitu a ni leh.
Inkhel pumpuiah Real goalkeeper Thibaut Courtois chu goal vengtu zingah tih tur ngah zawkah a tang a, Foden-a tauh goal tur a dan bakah Fernandinho pawhin goal a khung teuh. Mahse City in goal an khung thei lova, Real in kum 2018 a 3-1 a final a an hneh Liverpool chu Paris-ah an hmachhawn ang.
An tlin lo leh tawh
Kum 2008 a Abu Dhabi mi hausa in an lei hnuah City in Premier League title vawi rukna tun season-ah chawi an tum a, mahse an sumin Champions League hlawhtlinna a la lei thei lo.
Season liamta a Chelsea laka final a an tlawm hnuah kumin hi an hun ni dawn a ngaihna awm mahse a tawpah erawh an tlin lo leh tawh.
Mahrez, Kevin de Bruyne, Bernardo Silva leh Foden ten Courtois goal-ah an khung thei lova. Jack Grealish goal khung tur Ferland Mendy chuan a pet chhuak hman.
Minute 210 an inkhelh chhungin City hi hun tam zawk chu a chungnung zawk an ni chungin a tawp an khar tha thei lo. Benzema goal a luh hnuah City player-ten tihngaihna an hre tawh lo hle.
Real Madrid boss Carlo Ancelotti chuan, “Kan tih than tawh ti a sawi chu theih loh mahse zanin ang khan Chelsea leh PSG hmaah pawh kan lo ti tawh. A chhan chu he club hian chanchin ropui tak a nei a, hei hi kan beh lai pawha min nawr kal tlat tu a ni.” tiin a sawi zui.