Vawk vulha eizawngte ngaihsak an ngai tawh hle
Vawk natna African Swine Fever (ASF) hri leng a la reh hlei thei lo a, a hluarna hmasaah reh deuhin lang mah se, hmun dangah khuahkhirh a ngai thar leh thin a, vawiin thlengin he hri leng vang hian nunphung a la pangngai thei lo. Vawk vulha eizawng tam tak an la buai phah hle bawk.
Hetih lai hian Mizoram sorkar atang chuan tanpuina pek hleih theih an la ni lo tluang zel a, sorkar laipuia Ministry of Fisheries, Animal Husbandry & Dairying-in vawk suat neitute hnena zangnadawmna a pek tur, Mizoram sorkar hnena Rs 5,84,97,000 a pek chu budget allocation-ah dah a nih tawh thu AH&Vety department hotuten sawiin, state sorkarin a tum ve tur erawh tihfel a la nih loh thu an sawi bawk.
Vawk vulha eizawng tam tak an mangang tawh a, an buai hle tawh bawk. Tho chhuak leh thei tawh lo tur tam tak an awm bawk a, an tawrhna hi na tak a ni.
Vety department hotute chuan vawk suat neitu, zangnadawmna dawng turte hi endik mek a nih thu an sawi a, “Kan hriat theih chinah chhungkaw 10,901 an ni a, hei hi final a la ni lo a, a la danglam thei,” an ti a. Zangnadawmna sum chu dan ding lai awm sa anga pek tur an nih thu leh vawk kg zat atanga chhuta pek tur a ni tih an sawi.
Sorkar laipuia scheme awm sa angin vawk suat neitute hnena zangnadawmna pek tur hi dil theih a ni a, sorkar laipui leh state sorkarin pawisa a inzata intum sem tur a ni a. State sorkarin a tum ve tur hi la tifel lo mah se sorkar laipui atanga sum dawn tawh hi a dawng tur hnenah pek phawt tur a nih thu Vety department hotute chuan an sawi bawk.