- V. Lalnunthara (Mathara) V. Thanga Street, Dawrpui
Mizoram Legislative Assembly kum 50 tlin Diamond Jubilee lawmna puala Zonet Cable TV in Speaker hmasa ber Dr. H. Thansanga (89) an kawmna kha ngun takin ka lo ngaithla a. A zawttu khan zawhna tha tak pakhat zawtin; Union Territory kan nih hnua MLA Inthlan hmasa ber 1972 kum ama mimal in a hmachhawn dan a zawt a. Kha a chhanna kha ka ngaihtuahna ah a riak zui reng mai. 1972 Inthlanpui chu Suangpuilawn bialah Mizo Union party ticket a hmachhawnin; khami tuma inthlan hmachhawn kha candidate tan a hahdamthlak hle tih a sawi a. A mimal pawisa Rs 2,000/- a pai ve pawh chu a hmang zo lo nasa mai tih a sawi bawk a. Candidate tana sum senna tur engmah awm lo khan; a dinna party mite khan thawhkhawmin; ei leh in thlengin an lo buatsaih vek a, an tanrualna a tha awm ngawt mai. Candidate tan khan sum han chelekna tur kha a awm lo reng reng a ni awm a. Tin, kha bialah khan khaw tin mai a fanna ah khan intiam tir tura nawrna mipui vantlangah a ri miah lo mai te kha vawiin nena khaikhinin; thu awihawm lo a chang hial dawn awm e.
Khaw pakhatah chuan candidate pakhatin; khawtlang tan radio pek a tiam a; intiam tir ve mai an tum ngawt a; radio ngawt lo, vantlang hmasawnna tur leh chhenfakawm tak din chu a ngaihpawimawh zawk tur thu in a chhang bawk tih kan hmu a. Rilru a lian ta ber erawh khatih lai a Mizote rilru lo la thianghlim zia mawlh mai kha a ni. Candidate atanga mipui ten sum pai thlerhlo an beisei ve lo leh candidate chu an pui tur zawk anih an thinlunga a chiang em em kha a ropui lai tak chu a ni a. Suangpuilawn bial mai ni loin; bial dangah pawh khatiang kha mipuite sukthlek leh an rilru ni vek awm pawh niin a rin theih. Awle, kum 50 a lo ral leh chuan kan dinhmun kan hria a; mipui te hian kan politician zawk te hi eiru lo thei lo in kan siam/nawr chang a awm ta fo ni a sawina te pawh a tlangthang ta hle a. A society anga insiamthatna ‘moral reformation’ pawh pulpit tlang atangin a ri tam ta fo mai.
Mizote’n 1972 a rilru thianghlim tak kan put kha engvanga pu zui thei ta lo nge kan nih tih hi zirchian tham zawng a ni ngei ang. Amaherawhchu thil chiang tak pakhat awm chu Mizote kha rilru thianghlim pu a kan khawsak tlanho lai kha a awm ngei a; thui tak chhui dawn tul pawh a ni lo lehnghal a. Min thlahtute anga rilru thianghlim leh dik, pamham lo, Mizo nun zemawi leh tha kha kan neih leh zel lohna tur chhan pakhat mah a awm lo a ni. Politics thianghlim lo kan tih te pawh hi a awlsam zawnga thlir chuan kan nun thianghlim loh vang lek a ni mai! Kum 50 liam ta a Zonun zemawi leh thianghlim nei let leh turin thutiam i la thar leh ang u.