Mizoram State Scrutiny Committee chuan Kamlova Chhangte-in Scheduled Tribe (ST) certificate pahnih a neihte an cancel-sak.
Chairman bakah member pathum awmna, State Scrutiny Committee nimina thukhawmin, Scheduled Tribe pawh ni lo Kamrul Islam Laskar hian dikhlel taka Kamlova Chhangte intia Scheduled Tribe certificate pahnih a neihte chu Section 7(1) of the Mizoram Scheduled Tribes & Scheduled Caste (Regulation of Inssuance & Verification of Community Act, 2014 hnuaiah Deputy Commissioner Aizawl District office-in June 27, 2018 leh June 12, 2020-ah te Kamlova Chhangte s/o Tlangchhuana Chhangte, Thuampui, Aizawl hming anga Scheduled Tribe certificate a lo pek chhuahte chu a cancel-sak a ni.
March 2, 2022-a Mizoram budget session-ah khan Chief Minister Zoramthanga chuan Kamrul-a tribal certificate paihsak chungchang chu ngaihtuah lai mek a nih thu house a lo hrilh tawh a ni.
ZPM Legislature Party member Dr Vanlalthlana zawh belhna chhangin Chief Minister Zoramthanga hian Kamrul-a tribal certificate hi an en fel mek leh ngaihtuah mek a nih thu a sawi a. A endiktu committee-in a lehkhate lain Kamrul-a tribal certificate chu paihsak tur a nih leh nih loh an en ang a, chumi thutlukna an siam atangin hmalak a nih tur thu a sawi.
Chief minister hian Kamrul-a tribal certificate hi an sorkar pek a nih loh thu sawi bawkin, “Contract hna a thawh tawhna pawh a rul tur emaw, a rul lo tur emaw tih lam chu keini rorelna a ni lo,” tiin, income tax chungchangah pawh committee-in a ngaihtuah lai mek a nih thu a lo sawi tawh bawk a ni.