Aizawl: Kolasib district chhungah African Swine Fever (ASF) vanga vawk thi 158 awm tawhin, kuminah erawh ASF vanga thi a la awm lo thung.
Kolasib DC Conference Hall-a nimina an chairman, John LT Sanga, Deputy Commissioner, Kolasib district hoin District Level Committee on African Swine Fever & other Transboundary Animal Diseases (TADs) an thukhawm a. Dr. Engkunga Chhangte, DVO-in a tar lan danin, ASF hriin Mizoram a luhchilh hnuah Kolasib-ah he hri vanga thi vawk 158 a awm tawh a. Hetih lai hian kum 2022 chhunga ASF vanga vawk thi rinhlelh atanga sample pariat endik chu a negative vek a; March -May, 2022 chhunga vawk thi 319 awm chu Classical Swine Fever hri vang a nih theih thu tar lan a ni.
Thutkhawmah hian Kolasib district chhungah kum 2021 khan AH & Vety, FOCUS leh MzSRLM tangkawpin Classical Swine Fever vaccine 5,322 pek a nih thu leh vawkpui 2,405 kah rai atangin vawk note 10,739 an awm mek thu sawi a ni a. Classical Swine Fever vaccine hi vawk note thla thum hnuai lam leh vawk rai laiah pek theih a ni lo a, Kolasib district-a vawk thi chhinchhiah tam zawk chu he vaccine la lo an nih thu tar lan a ni bawk.