President Ram Nath Kovind-a’n nimin tlai khan Mizoram University (MZU) Convocation vawi 16-na a hmanpui.
President chuan Mizoram University-a zirlai hlawhtlingte leh an nu leh pate a lawmpui thu sawiin, tun tuma MZU atanga degree nei leh a titha filawr thlanchhuah zinga a tam zawk hmeichhia an nih avanga lawmawm a tih thu sawi a. “Mizorama hmeichhe lehkha thiam rualte hlawhtlinna atang hian India ramah hmeichhiaten nasa takin hma an sawn tih a lang a ni,” a ti.
New Education Policy (NEP) 2020 thil tum ber research based education, skill development, entrepreneurship leh vocational education te a nih thu sawiin, hemi huangah hian MZU-in thui tak hma a lak tawh thu president chuan a sawi a. Department of Science & Technolgy, Government of India nen thawkhova Incubation Centre pathum MZU-in a din chu hmasawnna nasa tak a nih thu a sawi.
President Kovind chuan tun hnaia Larsap Hari Babu Kambhampati-a’n MZU tihchangtlunna project Rs vbc 60.31 EWS scheme a hawn chuan nakin lawkah MZU leh Mizorama zirna sang zawkte university tha leh hlun zawkte tlukpuiah a la siam dawn niin a sawi a. Mizoram chu ramhmul – thing leh mauah a hausa tih sawiin, entrepreneur-ten mau sawngbawlna lam hawia industry leh horticulture bakah floriculture lam an hawi a fuh ber a rin thu president chuan a sawi.
University-ten company-te ang bawka an awmna state chhunga mipui vantlang tana rawngbawl kawngah mawhphurhna an neih thu sawiin, president chuan company-ten CSR hmanga vantlang hmasawnna an thawk thin ang bawkin university-te pawhin University Social Responsibility (USR) an neih thu leh USR hnuaiah thingtlang khuate chu model village atan thlangin a tihhmasawnna kawngah tan an lakpui thin tur a nih thu a sawi.
Mizoram chu reilo te chhungin sumdawnna hmunpui, India hmarchhak tihhmasawn kawnga state pawimawh tak a ni chho dawn niin president chuan a sawi a. International ramri thui tak – Myanmar leh Bangladesh nena intawm chu border trade tihhlawhtlinna hmun remchang a nih chhoh mek thu a sawi bawk.