Aizawl : Kumin January atanga March thla thleng khan Aizawl district-ah Tuberculosis (TB) vei 292 hmuhchhuah an ni a. Mizorama district hrang hrang zingah kumina TB vei hmuhchhuah tam berna district a ni.
National TB Elimination Programme – NTEP 1st quarter review meeting nimina neiha tarlan a nih danin, January – March chhung khan Siaha district-ah TB vei mi 32 hmuhchhuah an ni a, Lunglei district-ah mi 30 hmuhchhuah an ni a. Mamit district-ah TB vei hmuhchhuah la tlem berin mi 9 hmuhchhuah an ni a, kumin January – March chhunga Mizorama TB vei hmuhchhuah zawng zawng 457 an ni.
Aizawl district-ah TB leh HIV vei kawp mi 62 hmuhchhuah niin, Champhai district-ah mi 10 leh Lawngtlai district-ah mi 1 hmuhchhuah an ni a. Kumin January atanga March thla thlenga Mizorama TB leh HIV vei kawp hmuhchhuah mi 85 an ni. MDR-TB vei Aizawlah tam berin mi 24 hmuhchhuah an ni a, Mizoram pumah mi 28 hmuhchhuah an ni tih NTEP 1st quarter review meeting-ah hian tarlan a ni bawk.
TB vei thei dinh- muna ding te TB laka invenna damdawi TB preventive therapy – TPT chu Kolasib district-ah pek tam ber niin, mi 98 pek theih te an vaia pek a ni a. Mizoramah mi 1554 TPT pek theih zingah mi 170-in TPT an la nia tarlan a ni.
NTEP 1st quarter review meeting-ah hian State TB officer Dr. Vanlalfela’n Central TB division nen tangkawpa TB vei zawnchhuah kawnga hmalak dan te a sawi a. TB venna damdawi TPT la thei zingah la lo an tam hle nia sawiin, tanlak leh awareness pekthat a tul thu a sawi bawk.
Tun thla ni 2-a State TB Forum meeting-a tarlan danin, nikum chhung khan Mizoramah TB vei hmuh chhuah 1749 awmin, za-a 90 te chu enkawl dam an ni a, TB vanga thi mi 72 an awm.
Nikum chuhngin MDR-TB vei mi 114 hmuhchhuah niin, TB leh HIV vei kawp mi 289 hmuhchhuah an ni.