Kamrul-a atang hian sorkar hnathawkte pawh i harh ang u
Contractor thawm na leh politics hmanga inbeihna nasa tak awm phahna Kamrul-a tribal certificate chu cancel-sak a ni ta a, hemi kawnga hmalatu officer te an fakawmin, an thil zirchianna hian nakin hun zelah pawh midangte tan fimkhurna kawngka hawnsak ngei bawk teh se.
Kan hriat theuh angin Kamlova Chhangte tia tribal certificate siamsak Kamrul Islam Laskar hian contract hna a hminga hmuh a ngah hle mai a, eptu lam atanga nawrna nasa tak a awm hnuah a tribal certificate cancel-sak a ni ta bawk. Mak lehzel chu, tribal certificate-hi pahnih (2) a lo nei hman zu nia!
Chairman bakah member pathum awmna, State Scrutiny Committee ningania thukhawmin, Scheduled Tribe pawh ni lo Kamrul Islam Laskar hian dikhlel taka Kamlova Chhangte intia Scheduled Tribe certificate pahnih a neihte chu Section 7(1) of the Mizoram Scheduled Tribes & Scheduled Caste (Regulation of Inssuance & Verification of Community Act, 2014 hnuaiah Deputy Commissioner Aizawl District office-in June 27, 2018 leh June 12, 2020-ah te Kamlova Chhangte s/o Tlangchhuana Chhangte, Thuampui, Aizawl hming anga Scheduled Tribe certificate a lo pek chhuahte chu a cancel-sak ta a ni.
Kan officer leh sorkar hnathawk zingah fel tak tak leh dik tak tak an awm lai hian lehkha pawimawh leh document enkawl kawngah tlema lo ngaihsam lui thei deuh an awm thin tih a chiang hle mai a, Kamrula’n TC pahnih a lo nei ngawt maite hi chhui chian a, a petu hnena hremna leklawk hial tling niin a lang bawk. Fimkhur nan i hmang tlang zawk tawh teh ang u.