Zothan Autoworks Pro Volleyball League 2022 chu zanin atangin an khel tan dawn a. Champion lai leh team tha an inkhel nghal dawn.
Inkhel hmasa berah phurna danglam tak nen Durtlang North an inlan dawn a, rilru na taka Chhinga Veng Spikers hmaa an tlawmna chhang let turin an inringtawk.
R Dengthuama Indoor Stadium, Mualpuiah Durtlang North-in hmabak neiin an khel dawn. Pro Volleyball hnuhnung ber 2019 final-ah champion thei tura hun tha vawi khat aia tam an neih hnuin Chhinga Vengin 25-23, 18-25, 22-25, 31-29, 15-13-in an hneh a ni.
Durtlang North captain Zomuanpuia chuan uiawm taka an tlawm hnua Pro Volleyball an khelh leh hmasak ber turah Chhinga Veng nen an intawn leh nghal dawn avangin an phur tih a sawi a. An theih anga thain an inbuatsaih a, player kum a inrualkhai tlang a, inrintawkna an nei sang hle tih a sawi.
Durtlang North-in squad ti chak turin state pawn player neih belh an inbeisei a, championship neih tawhah hnam dang player-ten awmzia an nei thin hle.
Chhinga Veng champion puitu coach Jesse Lalpianpuia chuan kum thum kal ta aiin an squad a chhah zawk tih a sawi ve thung.
2019 final-ah a tira player paruk a luhtir zinga pali a la kawl a, player dang pali a neih belh bakah Karnataka state team player Sujith Acharya an la lut bawk a ni.
Jesse-a chuan Durtlang North hneh a tha taka championship bul an tan ngei a rin bakah, champion thei team aia tha zawk a kawl mek niin a sawi a.
An club tana khel fo tawh leh trophy pahnih lakpui tawh Sujith-an champion nawn thei turin Spikers tan hun tha a siamsak ngei a beisei hle.
ZOTHAN AUTOWORKS PRO VOLLEYBALL LEAGUE 2022
Zanin inkhel tur :
8:00 PM Chhinga Veng Spikers v Durtlang North (Mipa)