Scottish football club Rangers in season duhawm an hman mek chu an tana duhthusam ni turin khar theihna hun an nei dawn a. Europa League final lut turin RB Leipzig chu inkhel boruak tang takah an hneh.
Glasgow a Ibrox Stadium a inkhelah Rangers hi first leg-ah 1-0 a tlawm tawh an ni a. Chan chhe zawk changin bul an tan.
Inkhel kalhmang thlak danglam turin minute 25 bak an mamawh lo. James Tavernier leh Glen Kamara ten minute 18-na leh 24-naah goal an khung a. 2-1 aggregate in hma an hruai.
German team in second half-ah Christopher Nkunku hmangin goal an khung a. An French midfielder chhuanvawr hian tun season a a goal 32-na a khung.
Mahse minute 10 a la awmin Rangers in an mamawh goal an khung a, John Lundstram chuan Ibrox mipui barakhaihin chakna goal a khung.
Player malkhai a lak a nei tha zawk Leipzig in Rangers hi an chhanglet thei lova. Inhliam avanga Rangers squad kim lo taka khel lakah goal an khung belh lo. Scottish team hian play-off round atang an Europa League zinkawng hi zawh tanin final an thlen dan a ropui hle.
Giovanni van Bronckhorst-a pawlten May 18-ah Seville khawpuiah final an khel dawn a. An hlawhtling a nih chuan kum 50 chhunga Rangers in European trophy an chawi hmasa ber a ni anga, season tharah Champions League group stage an khel ang.
A hun takah Rangers
Tun season a Rangers thawnthu a ngaihnawm a, an inkhel hmuhnawm thin thiamna piah lamah rilru paukhauhna leh huaisenna an chakpui thin.
He Rangers team hi tuna Aston Villa enkawltu Steven Gerrard-a’n kum 2018 atanga a duan an ni a, mahse nikum November khan Gerrard-a’n Aston Villa a pan hnuah Van Bronckhorst-a’n a enkawl a, an buai phah lem lo.
Leipzig in na takin nawr mahse player inhliam nei chung pawhin Rangers an tang nghet tlat.
Player tin inpekna a sang a, a bikin tlarhnung leh midfield-ah Lundstram a fakawm. Glen Kamara a hun takah inlar in goal nawr avanga lar ni lo mahse an goal hmasa pahnihah mawh a phur.
Final kalkawngah Borussia Dortmund leh Leipzig te an paihthlak tawh avangin Frankfurt lakah inrintawkna an nei ngei ang.
An manager Giovanni van Bronckhorst chuan, “Thu a sawifiah thiam a har, zan duhawm a ni.Goal hmasa pahnih kha a pawimawh a, kha kha kan tum tak a ni. Leipzig in min nawr dawn tih kan hria, a tawp lama goal kan khung leh chiah kha kan chan ti thatu a ni bawk.” tiin an inkhel a thlirlet a.
“Hei aia thawnthu ngaihnawm hi a awm leh chuang lo. Kan zavaiin kan thlen chin hi kan chhuang tawh hle.” a ti bawk.
Hammers an tling zo lo
West Ham United in Europe a hlawhtlinna nei tura duhthu an sam thin chu nuai mit a ni a. Europa League semi-final-ah Eintracht Frankfurt an paltlang zo lo.
Deutsche Bank Park-ah David Moyes leh a pawlte an talbuai a. Amah hnawhchhuah a nih bakah an defender Aaron Cresswell chu minute 19-naah red card pek a ni a. 1-0 in an tlawm.
Mahni mual a 2-1 a tlawm tawh Hammers tan bul tan dan duhawm lo tak a ni a. Tlem zawk an nih hnu lawkah Rafael Borre chuan Ansgar Knauff-a ball siamsak goal-ah a khung a. An dinhmun tha chu a aia tha zawkah a hlang.
Tlem zawk an nih avangin Hammers tan result thlak danglam tura beiseina a tlem telh telh a, Michail Antonio leh Tomas Soucek ten chance an neih ve bak hlauhawm sawi tur an ngah lo.
Frankfurt hian kum 1980 hnua a vawikhatna atan Europe huap inelna final an khel dawn.
Frankfurt coach Oliver Glasner chuan, “Inkhel hautak tak a ni a, team goal tha tak kan khung kha kan chakpui. Second half-ah theihtawp tak zeta kan inven a ngai a, kan hlawhtling hi kan team ka chhuang hle. Kum 42 hnua final kan khel tur hi kan fans te tan pawh thil lawmawm a ni.” a ti.