Naupang chhia mai ka nih lai chuan mahni phak tawk tawkin ngaihtuah-na ka seng ve thin a: ‘Amor omnia vincit – ‘Hmangaihnain a hneh ban’ tia Mizo tawnga kan lehlin, Sap hovin mawi fahran maia ‘Love conqures all’ an lo tih chu a takin la changchawi lo mahila a tak rama han dailuh ve chu a châkawm hle thin. Chu chu a nihna tur pawh a ni.
Mahse, engatinge tungchhova kal mihringte hi fing viau leh changkang hle siin Hmangaihna ah kher kher hian kan mit hi tih-dela a lo awm thin le? Sualnain khawvel a luhchilh atang khan mipate chuan hmeichhe hmangaihna avangin an lo inhnial buai tawh a, inbeihna te thlenin an inthat hial a, he hmangaihna vang vek hian nunna pawh an chan hial.
Engvangin nge he emotion muanawm leh mawi tak mai hian tharum thawhna leh inhuatnaah mi a hruai luh thin? Engmah hi ka hrethiam tawh lo a ni e.
Thil hote anga lang si, mahse mi-hring finna leh thiamna pawhin a chhui zawh sen rual loh ni bawk si hi engtinnge kan tih tak ang? Kum sang tam tak kalta atang tawh khan mipa leh hmei-chhia te chuan he thil mak tak hi chhuichhuah tumin an lo bei nasa tawh. Mipate chuan vansangah thlawkin hmeichhia te pawhin van dum pawlah te an leng ziai ziai tawh a ni lawm ni!
Ralthuam tihbaiawm tak tak leh insuatna hrang hrang hman a nih laia ‘HMANGAIHNA’ bikah engmah kan ti leh si lo hi enge a awm zia? Minute tin, nitin, kumtin mai hian tuemaw chu hmangaihnain a hliam renga, mipakhatin hliam a tawrh chuan a tlem berah mi sawm te hi chuan rilru hreh-awm takin hmangaihna hi an thlir zui vawng vawng ngei ang.
Hmangaihna hian mihringte min thlunzawm a, chuvang chuan hemi avang hian engkim mai hi chan (hloh) kan huam thin. Ram hmangaihna te, chhung te hmangaihna te leh hmeichhe hmangaihna te hian chin lem a nei chuang lo.
A thawh dan hi inang lo vek mahse a tum leh nihna chu thuhmun vek a ni tho. Hmangaihna hi khawiah pawh a awm a, khawi-ahmah pawh a awm lo ve thei bawk.
Hmangaihna hi a taka tawng ve tawh niin ka inhria a, mahse han sawifiah tur erawh chuan bul ka la tan thei lo fo zawng a nih hi. Ka hrethiam mai lo. Kan nei thei vek a, hemi avang hian nunna inlaksakna pawh a thleng zui reng. Engvangin nge? Engatinge hmangaihna hian zawhna tam tak a ken tel laiin a chhanna engmah a pek chhuah leh si loh? Engatinge? Min chhang thei in awm mial lo maw???