Pro Volleyball League chanchina team hlawhtling ber Hunthar Veng inlan hun a thleng a. Tuichangral nen zaninah an inkhel dawn.
2017 leh 2018 khan kum zawnin Hunthar an champion a, Pro Volleyball-a vawi khat aia tam champion thei dawn chhun niin championship hnuhnung ber 2019 khan Chawnpui Sports Centre-ah final an lut pha lo.
Hunthar hian team tichak turin Haryana atangin feet ruk leh inchi li chuanga sang Gagan Kumar an la lut a, kum 22 mi hian Under 23 Asian Championship-ah India aiawhin silver medal a la tawh.
Hunthar coach VL Malsawma Renthlei chuan an player-te an inkhairual tawk lo tih a sawi a, hriat hlawh tawh Remsangzuala, Laldensanga leh Ramnunfela te kawl mah se player dangte chu kum lama naupang leh tawn hriat la nei lo an ni hlawm a, an elpuite lakah team tha tak an nei bik lo nia a hriat thu a sawi.
Sawma chuan, “Kum thum kal ta khan inkhelhna hall a tet deuh avangin a kotlanga mipui au thawmin awmzia a nei tam tawk lo va, tunah chuan hall lian, mipui len hnemnaah khelh a ni leh dawn. A hmuna tawiawmtu leh thlawptu mipui an that ngei chuan hnehna kawng zawh theih nan team tan thahrui a ang.” a ti.
Tuichangralin kum thum kal ta khan semifinal an lut a, hmasawn zawka khelh ngei tumin Mizoram pawn atangin Services player Sahil Kumar an la lut. Ani bakah captain leh setter David Lalramhmachhuana bakah Lalrinhlua leh F Lalngilneia chu an player pawimawh tur an ni.
Coach Eric Lalsangliana Pautu chuan sang tak thlen tumin an inpuahchah tih a sawi a, mipui rin danah champion thei tur khawpin an boruak lian zo lo mah se kum tha hmangin mipui barakhaih ngei tumin ngawrh takin an inpuahchah a ni.