Football manager ropui Jose Mourinho chuan club thar final a thlenpui leh a. AS Roma in UEFA Europa Conference League final hmasa ber khel turin Leicester City an hneh.
Ningani zanah UECL semi-final second leg hi khelh a ni a. Stadio Olimpico-ah English club nen Roma hi an inkhel.
First leg a 1-1 a an inhnehtawk hnuah Rome a inkhelah pawh team pahnih an inthlau lo leh hle.
Amaherawhchu minute 11-naah Leicester City in set piece a an tlarhnung phui lo leh thin chu an tuar a. Roma tan inkhela team pahnih inkar danglamna ni turin Tammy Abraham chuan goal awmchun a khung a. Lorenzo Pellegrini corner pet chu a tauh lut.
Leicester City in goal zawna chance tha nei turin minute 78 lai an nghah a ngai a. Uluk leh nghet taka mahni goal veng Roma thiah an harsat thin hle.
Roma hian 1991 UEFA Cup a Inter Milan an hneh loh hnuah Europe huap inelna a final an thlen leh hmasak ber a ni a. May 25 hian Tirana, Albania-ah Dutch club Feyenoord nen final hi an khel ang.
He inelna a champion hian season tharah UEFA Champions League khel tura an league a an tling a nih loh chuan 2022/23 Europa League group stage an khel nghal thei ang.
Inkhel zawhah final an luh avanga mittui luang Mourinho chuan, “Ka thinlung a khawih a, hei hi kan tan chuan Champions League ve a ni. Rome a chen a, hna thawh bawk chuan kan nun hi Rome a ni a. He club hi Rome club dik tak chu a ni. Club lian a ni chungin hetiang hun thlen hi a khat a, final thlen ngei hi a tul a ni tih hna ka thawh tan ni atangin ka hre nghal.” tiin a sawi.
Semi-final lehlamah Olympique Marseille in an mikhualte lakah goal an khung thei lova. First leg-a 3-2 a hnehna chang Feyenoord lakah huntha nei mahse an dinhmun an thlak danglam theih loh avangin final an thleng zo lo.