Indore khawpuia tlangval kum 28 mi chu Inrinni khan building lian tak hala puhin man a ni a, mi pasarih thiin mi dang pakuain hliam an tuar bawk a. A haltua puh hi an man tawh tih Madhya Pradesh police chuan an sawi.
Police-in an sawi dan chuan a haltua an puh hian a ngaihzawng thin chenna in a hal niin an sawi a. Nula nen hian an inkawp thin a, tun hnaiah inthenin pasal dang neih a tum a, a thinrim chu hetiang hian an che ta niin an sawi.
Sanjay an tih bawk, Shubham Dixit-a hi Inrinni zan khan Lohamandi-ah man a ni a. A ke leh a bânah hliam tuar chunga a tlanchhia chu an man a. Police hian damdawi inah an dah phawt a, an man zui ta niin Vijay Nagar police station in-charge Tehzeeb Qazi chuan a sawi.
Pathianni khan court-ah hruai nghal a ni.
Police officer chuan Dixit-a hi Jhansi-a cheng a ni a, Swarnbagh Colony building-a a nu nena cheng nula nen hian an inngaizawng thin a, pasal dang neih a tum a. Police hnena a sawi dan chuan nula hian Rs. 10,000 pawh a la puksak a ni.
“Zirtawpni zan khan pawisa hi dilin a bia a, building bul maia an inhmu chu an inhnial thinrim ta a, kut pawh a thlak a. A hnuah building-a parking area-ah kalin bike atangin petrol la chhuakin hmeichhe scooty a hal ta a ni,” a ti.
Police-in CCTV camera 100 vela thlalak an enah chuan video clip pakhatah police hian mi pakhatin building a lut a, chhuak lehin two-wheeler a hal an hmu a. CCTV camera leh electricity meter tihchhiat a tum bawk a. A hnu reilo teah let lehin a thiltih vanga thil thleng a en leh a, building pum a lo kang tawh si niin police officer chuan a sawi.
A ngaihzawng leh a nu hi hrui hmangin uaiin himin an chhuak a. Police chuan nula pawh hi kawmin mipa nena an inhnialna hi a la sawi duh rih lo.
Indore police commissioner HN Mishra chuan, “Shubham Dixit-a hian hmeichhiain a lo bum avang hian a scooty chauh halsak a tum a, a tum loh deuh a thleng ta niin a insawi,” a ti.
Mishra chuan Dixit-a hian Delhi-ah pawh thubuai a lo nei tawh niin a sawi a. “Court-ah hian thu zawh fiah tura kawl kan dil a ni,” a ti.