Nantes in an club chanchin a vawi li nan Coupe de France an chawi a. Inrinni zan final-ah penalty hmanga goal an khung chakpui in 1-0 in Nice an hneh.
Stade de France a final-ah first half-ah attacking football hmuh tur a awm lova. Team pahnihte an fimkhur.
Tun season a league inkhel vawi hnih a Nice in an hneh ve ve tawh Nantes in second half tan hnu lawkah goal an khung zawk a. Hicham Boudaoui handball avangin penalty an hmu a, hei hi Ludovic Blas chuan goal-ah chiang takin minute 47-naah a khung.
Nice in Nantes tlarhnung an su tlang hleithei lova. Nantes keeper Alban Lafont chge tha bawkin Nice tlarhma vawi engemaw zat a dang a. Amine Gouiri goal khung tur vawi hnih a dansak a ropui hle.
Nantes hian kum 2000 hnua French Cup an chawi leh hmasak ber a ni a. An coach Antoine Kombouare chuan he trophy hi player leh coach anga vawi li a chawina a ni thung a. PSG player angin tum hnih a chawi tawh a, PSG coach a nihlaiin vawi khat a chawi bawk.
Hetihlai hian Nice hian he inelna a Paris Saint-Germain chungnunna titawpin champion lai paihthla in kum 1997 hnua a vawikhatna atan final an khel a. Mahse hun pawimawhah erawh hnehna an chang thei lo.
Kombouaré chuan, “Kan hlawhtlinna hi thil danglam leh hlu tak a ni. Ka suangtuahna ramah pawh hetiang hi ka beisei pha lova, Nantes a lo kal a trophy chawipui hi ka inbeisei ngam ngal lo. Ka staff leh player te zawng zawng hnenah lawmthu ka sawi a. Hei hi an hlawhtlinna a ni.” a ti.