Premier League champion ni tura intlansiaknaah Liverpool in point an hloh a. October thla hnua a vawikhatna atan Anfield-ah point thum hmu thei lovin Tottenham nen 1-1 in an inhnehtawk.
Inkhel result avangin Liverpool hian goal difference in Manchester City lakah hma an hruai a, nimahsela nizana Newcastle United nena inkhel Pep Guardiola pawlten hnehna an chan chuan point thumin hma an hruai thei.
Minute 56-naah mikhual team tan Son Heung-min chuan counter-attack goal mawi a khung a. Liverpool in na taka nawr zuiin Luis Diaz chuan minute 74-naah an si phurh a sut.
Champion tura beisei an neih chungchang Liverpool manager Jurgen Klopp chuan a sawi zui a. “City hian point an hloh turah ka ngai lem lo. Chetsual han nei se chu ka ti viau a, mahse ka beisei lem lo. Kan rilru a awm hi Man City leh Newcastle a ni lova, Thawhlehni a Aston Villa kan khelh leh tur hi a ni.” a ti.
Man United an mualpho
Champions League beisei nei tawh lo turin Manchester United mualpho takin an tlawm a. Brighton & Hove Albion in Amex Stadium-ah 4-0 in an sawp.
Ecuador international Moises Caicedo chuan Premier League a a goal hmasa ber khungin minute 15-naah goal a khung a. Second half-ah Marc Cucurella, Pascal Gross leh Leandro Trossard ten goal dang an khung chhunzawm.
United hi away inkhelah a zawna vawi nga an tlawmna a ni a, tun season-ah Premier League-ah parukna aia sang an ni thei tawh lo.
Kum 30 chhunga a vawi nga na atan Europe huap inelna lianah an tel dawn lova, Champions League hnuaia mi Europa League pawh an khelpha ang em tih a chiang lo mek.