- Lallunghnema, Charity Lodge
Consumer Huang chhiartute hnen atanga chanchin tha lam dawn hi a hlimawmin a nuam thin hle! Feed-back min pe thin a,chona nasa tak a tling fo bawk. Mahse,keini buan ve hi chu thil nuam lo tak a ni thin tho! Thil sual titute vin leh hauh a tul lai a tam hle. Dan bawhchhetute vau titih, tlawn titih a chet lak a tul chang a tam thin hle bawk.Phur lo tak chunga consumer harsatna neite thil um zuisak hi a tam em em bawk thin.Mahse,kan hna a ni miau a,hreh lo awm takin kan che chhuak fo.Tunlaia ka nin em em chu, mihausa leh sumdawng ho zinga hlawhfa man pe tha duh lote hi an ni.Anmahni ruaitute laka lungawi lote hian min pan ta fo mai. Civil Ukil ka ni si lo,Consumer Ukil hlawh nei lo ka ni zawk em ni!?Consumer Activist erawh ka ni ve chhap e.Ka thupui ber chu Consumerte tana thawh hi a ni hmiah. Hlawh awm si lo,lawmthu sawina lak lah a ni chiah hek lo.Mahse,channa pawh ni se,,tanpui ngaite tanpui hi a nuam a,a inchhirawm lo hle a ni.
On -line business khawihtute hian direct selling an ti a ni a.Chu mi awmzia chu hetianga sumdawngtute hian an bungruate chu home delivery system a nih angin thil chahtute kawtkai ngeiah an bungruate chu an pe ngei ngei tur a ni a.Tute mahin home delivery hi an hnial tur a ni lova.Kawng a chhia emaw a tha emaw a lo kual deuh a nih pawhin a theih ang angin door delivery an ti ngei ngei tur a ni.Hetianga ti lo chuan dan a bawhchhia a ni.Consumer Protection Act 2019 sec.2(11) hmanga hrem theih a ni.Tunlai hian hetiang chhuanlam ho te te siama home delivery ti tha duh lo hi an tam hle a ni.He thu ziaktu ngei pawh hian ka tawng nual a.Ngaihdam min dil ta ngawt pawh an awm nual bawk. Company lar tak tak hnuaia thawk delivery boy rinawm leh fel tak tak hmuh tur an awm teuh bawk.Sumdawnghovin an hriat fuh loh pakhat chu bungraw chahtute an nam nul thin hi a ni.Chhuanlam belh chian dawl lo leh innghahna tlak awm lova,bungraw thleng an phal lo thin hi an ze tha lo tak a ni. An innghahna tur chu customer’s satisfaction hi a ni.An thupui a ni tur a ni.Customer an tihlawm tam poh leh an sales a tha dawn tihna a ni.Customer ngah leh neih tam hi khawvel economy innghahna a ni a,sumdawng lianho din chhuahna pawh hi customer ngah a ni.Customer tlem leh hlawhtlinna hi a inhmeh lo. Customer ngah apiang dawrkai leh Sumdawng hlawhtling an ni zel. Customer neih lo chu an beidawng a,an hlawhchham a ni.Customer tilawm apiang an hlawhtling.Customer tilawm thiam chuan hlawhchham ni a hmu ngai hek lovang. Bungraw chhia leh hman tlak lo pawh hlawhchhamna bul a ni.Hetiang a nih avang hian heng group pahnih buyer leh sellerte hi inngheng renga an awm a tul hle a .Buyer tel lo chuan sellerin awmzia a nei lo,seller tel lo chuan buyer a awm theih hek loh.Ram economy thannaah an pawimawh hle a ni.
Sumdawng leh Consumerte inkar tha awm tur chuan rinawmna a pawimawh ber kan ti thin! Bungraw belh chian dawl,bungraw hman tlak, service tha hi a tul a ni.
Kan thupui hi hetiang hian ka’n sawi zar zar ang e.Kum 4 chhung zet Re1/- hmu let leh tura Consumer Foruma Tamil Nadu State Transport Corporation a khinnaah Advocate chuan hnehna a chang ta nge nge a ni.Advocate M.Sadasivam chu ni 22. August.2018 ah an khua Arakasanapalli panin Tamil Nadu State Transport Coorpirationah a chuang a.Hlim takin footmat pakhat hi,zang khai tak chu a keng tel bawk a Chutih lai chuan TNSTC bus conductor- chuan footmat pakhat man atan Rs 9/- a dil a.He Advocate hian Rs 10/- a pe a..Re 1/- chu Conductor hian a kir leh tur a ni.Mahse,Conductor hian a kir duh ta lova.He vaipa hian Coorporation Office-ahte kalin Complaint a thehlut a. Mahse, engah mah an lo ngai lova, a thu leh hla pawh chu an ngaihthlak sak duh lo a ni. Footmat ken mai mai tham lek phurh man atana Rs 9/- zet an Conductorin a la pawh chu hriat thiam a har hle ni tur a ni. Footmat te tak te, zangkhai tak phurh man Conductor-in a la hi dan ve reng a ni em? tih Ukil hian RTI a zawt hial nghe nghe a ni. Information Commission chuan bungraw te tham, ken mai mai theih ang chi phurh man charge loh tur a ni, phurh man chawi loh tur. Phurh man latu chuan dan a bawh chhia a ni,tiin zawhna chu a chhang a ni.
Conductor leh Tamil Nadu State Transport Coorporation hian Dan an bawh chhe ve ve a ni. Advocate hian District Consumer Commission hnenah zualkovin Conductor leh TNSTC chu a khing ta a. Kum li hnuah thiam a chang ta a, Bus Conductor- hian Re 1- a refund anga, TNSTC Manager ten Re 9/-an refund thung ang a. Tin, TNSTC hian compensation Rs 10000/- chu Advocate hnenah an pe tur a ni. He thutlukna hi ni 45 chhungin tihpuitlin tur a ni. He judgement & Order hi thla hmasa kha tihchhuah a ni. He thutlukna awm zen zen lo hi social media-ah tih chhuah a ni a. Kan Pawl Consumer Advocacy Group-ah member pakhatin a shared a ni. Mizorama consumerte lo hriat atan ka han sawi leh hram a ni a. Mizoramah chauh lo pawh hian State dangah pawh hian Consumerte hmuhsitna a thleng nasa ve hle thin. Consumerte tuarna hi a tawp theih nan Consumerte kan tanrual a ngai hle. Hemi atan hian rules and regulation,mannual-te pawh hi kan zir peih a ngai a ni.
Re 1/- thlakhlelh vang ni lova dikna duh avanga Advocate hnehna hi a ropui a, entawn tlak a ni. “Ni mai mai teh se, a tam lo bawk a” tih thuthlung kan vawn chhung hi chuan consumerte tan kawl a eng lul lovang tih hi ka chiang hle a ni.
Consumer harsatna neite kan pui thei reng e.