Chelsea in tun nipuiah nasa takin an squad siksawi a ngai dawn niin a lang zel a. An captain Cesar Azpilicueta lalut turin Barcelona in contract an zawrh lian hle.
Thomas Tuchel-a leh Chelsea a player lakluh tur ngaihventute lamin hna an thawk ngawrh mek a, club neitu thar Todd Boehly-a hnuaiah club in player an lakluh theih veleh a rang taka an chet nghal theihna turin player tinzawn tur an thlang fel mek.
Tun dinhmunah central defender pahnih an dah pawimawh a, player chhuak tur a zirin central midfielder, wing-back leh forward thar pawh an melh ang.
Chiang zawkin
Barcelona in Azpilicueta hi kum hnih contract bakah kum khat dang ziah belh theihna pek an inhuam a, a hlawh an pun dawn bawk.
Kum 32 mi hian Camp Nou-ah kum khatah Pound maktaduai 11 vel a hlawh dawn niin an sawi.
Catalan club tan hlawh pek len hi player man a sum sen teuh aiin a harsa lo zawk a. Hei vang hian Azpilicueta teammate Marcos Alonso pawh an ngaihven mek.
Hetihlai hian Blues in an tlarhnung a khel turin Jules Kounde, Presnel Kimpembe, Josko Gvardiol leh Jose Gimenez te an enthla mek a.
Juventus in Jorginho an ngaihven avangin Conor Gallagher ko let bakah West Ham atang Declan Rice emaw Monaco a khel Aurelien Tchouameni te an tinzawn bawk.
Wing-back thar ni turin Marc Cucurella nen sawizawm an ni a. Timo Werner leh Romelu Lukaku ten beisei an phak loh avangin striker thar pawh an melh tel niin thu a thang tel.