Golden Jubilee pualin Special Session
|| Rorel kalpui dan hi parliament tan hial pawha entawn tlak a ni : Larsap

Mizoram Legislative Assembly kum 50 tlinna, Golden Jubilee chu lawm mek a ni a, hemi denchhenin nimin khan Special Session neih a ni a; he huna thusawitu Larsap Hari Babu Kambhampati chuan Mizoram Assembly chhunga rorel kalpui dan chu parliament tan hial pawh entawn tlaka mawi a nih thu a sawi.
Special session-ah hian Assam Legislative Assembly aiawhin Speaker Biswajit Daimary a tel a, assembly speaker hlui leh MLA hlui thahnem tak an tel a ni.
Larsap chuan, Golden Jubilee thuchah sawiin, “May 10, 1972 khan Mizoram UT sorkara MLA 33 awmna assembly thutkhawm hmasa ber chu neih a ni a, hemi ni atangin hian Mizoram Legislative Assembly chuan hma lam pan zelin nasa takin hma a sawn tawh,” a ti.
Mizoram Assembly chhunga thutkhawm neih leh an rorelna kalpui dante chu a felfai thin em avangin state dangte mai ni lovin parliament tan hial pawh entawn tlaka mawi a nih thu a sawi.
Mizoram chhungah hnam hrang hrang leh sakhaw hrang hrang betute chu inngeih tlang taka an awm mek thu larsap chuan sawiin, Mizoram hmabak a ên thu a sawi a, Bangladesh leh Myanmar nen ramri intawm a nih avangin Asia chhim leh Asia chhimchhak ram leh India inkalpawhna a ni chho mek tih a sawi a, “KMMTTP leh rel kawngte a puitlin hunah phei chuan ram mite tana thawh sen loh thawh tur a awm dawn,” a ti.
Larsap chuan Mizoramin tuna a mamawh chu kawlpetha hnianghnar tak siam theihna a neih anga siam a nih thu sawiin, khualzinmite hipna tha tak tak a neihte hmanga sum hai luh dan ngaihtuahte leh health sector bika tan lak zual a nih thu a sawi.
Special Session hawngtu Chief Minister Zoramthanga, house leader ni bawk chuan Mizoram Legislative Assembly chu state dangte assembly aiin la naupang zawk deuh mah se house chhunga rorelna kalpui a nih thin danah na na na chuan state upa zawkte entawn a nih mek thu a sawi a, “Entawntlak assembly session a nih chhoh zel kan ring bawk a ni,” a ti.
State dangin Mizoram chu entawn tlaka an ngaihna dang leh mi sawi a hlawhna chu remna leh muanna a neih hi a nih thu a sawi a, khati khawpa rambuai ni si kum 30 chuang remna leh muanna tha em em, entawntlak a nei thei ta chu hlu a tih thu a sawi a; ‘Remna leh muanna’ chu mamawh ngawih ngawihtu India ram chhim leh hmar chhak leh thlang a thawn chhuak tur an nih thu a sawi bawk.
Special Session chhimtu, Assam Assembly Speaker Biswajit Daimary pawhin thu a sawi a, Mizoram mipuite nen undivided Assam-ah an awm ho thin thu te, Mizoram atangin MLA hmasa ber pathumte pawh an chhuanawm thin hle nia an hriat thute a sawi a; Mizoram a indan hnuah Mizoram Legislative Assembly-in kum 50 hmel a hmu chu Assam chief minister leh mipuite pawhin an lawmpui hle tih a sawi.
Golden Jubilee denchhena Special Session-ah hian tel pui tura sawm Lok Sabha Speaker Om Birla chu dam lohna thil avangin a tel thei ta lo a, Golden Jubilee lawmpuina thuchah a rawn thawn chu assembly speaker-in a chhiar chhuak a, legislature party aiawhin Dy CM Tawnluia, Lalduhoma leh Niharkanti Chakma leh Dr. BD Chakma ten thu an sawi bawk.
Special Session neih zawhah hian larsap chuan Golden Jubilee hriatrengna lung phum hawngin, Jubilee dar vuakna hun hman a ni bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427