Yessenia Mollinedo leh Sheila Johana Garcia chu thah an ni leh ta a, kumina Mexico-a chanchinbua thawk thah chu mi 11 an tling ta a, indona hmun ni si lovah chuan chanchinbumite tana hmun hlauhawm ber a ni mek.
Anni pahnih hi Thawhtanni khan Veracruz state-a Cosoleacaque khawpuiah eichawp dawr kawtah beih an ni tih thuneitute leh chanchinbumite dikna chanvo humhalhtu pawl chuan a sawi.
Mollinedo hi news portal El Veraz-a an director niin Garcia hi he site thova reporter hi a ni a, an chanchintharah hian tual chhung thil leh khawpui roreltute atanga vantlang hriat tur ang chi leh thil tih tur awm ang an tar lang thin.
Veracruz Attorney General Veronica Hernandez-i chuan tualthahna thleng chu an chhui mek tih a sawi.
“Kil tin atanga chhui a ni a, chanchinbua an thawh dan pawh en tel a ni,” tiin thuchhuah a siamah a tar lang.
State Commission for Attention To and Protection of Journalists chuan Veracruz-a chanchinbumite beih an ni a dem thu a sawi a, an chhui ve thu an tar lang a. Chanchinbumite dikna humhalhtu pawl, Reporters Without Borders (RSF) leh Article 19 chuan inthahna thleng dan chu an la khawm mek tih an sawi bawk.
Chanchinbumi thah an ni tih hriat a nih veleh hian an laka tharum thawhna thleng nasa lutuk duh lohna lantirna leh kar hmasaa kum 59 mi nia thah tak, Luis Enrique Ramirez Ramos-a hriat rengna chu chanchinbumiten an lantir nghal a.
Ramos-a hi chanchinbumi leh chanchinbua huang neia thu ziak thin (columnist) niin kar hmasa khan Sinaloa state capital, Culiacan daia bawlhhlawh dah khawmnaah a ruang chhar a ni.
RSF chuan Ramos-a hi kumina Mexico-a chanchinbumi thah pakuana niin an sawi a. Tunah pahnih an thi leh ta a ni.