Russian President Vladimir Putin-a chu tun hnaiah a hriselna dinhmun a hniam nia sawi awm mekah thil tirinhlelhawmtu a awm belh leh a. Khaw awm dan pangngai tak hnuaia Victory Day lawmnaah a mal vel chu puana tuam lum a ngai bik a, hei hian a dinhmun tha lo anga sawina thawm a tiring lehzual.
Social media-a thlalak leh video darhah Putin-a hi puan chhah tak hringin a mal vel khuhin, Indopui II-naa tel sipai leh mi pawimawhte nen Moscow-a Red Square-a sipai kalrem lâm an thlirho a ni.
Independent chanchinbu chuan Russian hruaitu hi bomber jacket dum hain a khuh lai hmuh a nih thu a tar lang bawk a. An ram khawpuia sipai kalrem lâm neihna hi 9°C niin khaw awm dan pangngai taka intuam a ngai bik chu mak tih a hlawh a ni.
A hma lama video thehdarh tawhah Putin-a hi a taksa khur laite pawh hmuh a lo ni tawh a. Kremlin hruaitu hian Parkinson’s disease emaw, cancer emaw nei nia ngaihna a awm.
Thla hmasa khan Kremlin hruaitu hi a cancer zai nia sawi a ni tawh a. Russian Telegram channel General SVR chuan rei vak lo chhung an ram a hruai hna pawh chawl rih tur angin an tar lang.
Social media-a video thehdarh dangah pawh Putin-a hi insangphek taka Russian Defence Minister Sergei Shoigu nena an inkawm laia dawhkan a dawm khur dawr dawr lai pawh a lo awm tawh.
Kum 69 mi, Putin-a hian Belarusian President Alexander Lukashenko nena an inkawm lai pawhin dawhkan a lo rinchhan ngar ngar tawh niin Newsweek chuan a tar lang bawk.
Kremlin chuan an hruaitu hriselna dinhmun chungchangah hian engmah an la sawi lo va. Hetih lai hian news.com.au chuan Kremlin hian Putin-a inlan vel hi a khuahkhirh nasa a, hei hian mi dang a kawm chungchangte pawh phal chin an siamsak niin tar lan a ni.
al-aqsa mosque inbeihna
Vladimir Vladimirovich Putin hi intelligence officer thin a ni a, kum 2012 atang khan presodent niin hemi hma, kum 2000 leh 2008 thleng a lo ni tawh bawk a. Prime minister pawh kum 1999 leh 2000 inkar leh 2008 leh 2012 inkar a lo ni tawh.
KGB foreign intelligence officer-ah kum 16 tangin lieutenant colonel (Podpolkovnik) a kai hman a, kum 1991 khan politics luhsanin Saint Petersburg-ah hmun a khuar a ni.
Kum 1996-ah Moscow-ah insawnin President Boris Yeltsin-a sorkarah a tel tan a. Federal Security Service (FSB) director leh Security Council-ah secretary rei lo te ni ve vein August, 1999 khan prime minister atan ruat a ni ta a ni.
Yeltsin-a a bân hnuah acting president a ni a, thla li pawh a la liam lo tihah president atan thlan niin kum 2004-ah thlan nawn leh a ni a. A hnuah an ram danin a zawna term hnih bak president a nih a phalsak loh avangin prime minister-ah kum 2008 leh 2012 inkar kha Dmitry Medvedev-a hnuaiah a kir leh a. Kum 2012 khan inthlan tihchingpenna a awm nia nasa taka puh a nih chungin president a ni leh.
Kum 2018-ah thlan nawn leh a ni a, April, 2021 khan mipui ngaihdan lak (referendum) hmangin an ram dan siam thain term hnih dang thlan nawn leh theih a ni mek a, kum 2036 thleng hun a la nei thei tihna a ni.