An ram eibar dinhmun chhe lutuk avanga Sri Lanka mipui thinrim inhawr khawmin rorel lai, Rajapaksa chhungkaw chenna an hal hnuah an ram pumah curfew puan a ni.
Thawhtannia Prime Minister Mahinda Rajapaksa a bân hnuah pawh mipui an la lungawi zo chuang lo va, zankhuain tharum thawhna a thleng.
Mipuiin a chenna in an hual a, zing khaw var dawnah sipaiten beihpui thlaka mittui tlakna hlo leh mipui tihthaih nana silai an hmeh puah hnuah an la chhuak thei hram an ni.
Curfew puan a ni chungin mipui inhawr khawm a reh chuang lo va. Thawhtanni atang khan mi pasarih an thi tawh a, mi 200 velin hliam an tuar tawh bawk.
Thuneituten tharum thawhna hmeh mih a nih theih nan thliarkar ram pumah hian Nilaini zing thleng curfew an puang.
Thawhlehni bikah chuan khawpui kawtthlerte chu a reh hle a; mahse, a hma zana tharum thawhna hnuhma erawh hmun tinah hmuh tur a awm a. Bus-te dilah nam liam a ni a, thenkhat chu a tukverh darthlalang tihkeh vek a ni a, lirthei ke halna hnuhma a tam hle bawk a. Prime minister chenna chhehvelah police tam tak an duty bawk.
Tuipui kam, Galle Face Green an tihah chuan mipui an la awmkhawm reng a. Thawhtannia buaina chhuaka hliam tuarte chu damdawi inah enkawl an ni a, thenkhat chu sorkar thlawptute an ni a, thenkhat chu police-in mittui tlakna hlova an phuh vanga hliam tuar an ni a. Sorkar duh lotute aiawhtu dan hre mite chuan prime minister thlawtute lakah thubuai an theh lut tih an sawi.
Thuneitute chuan Colombo khawpuiah sorkar thlawptute an thunun zo lo tia puhin mi pahnihin police hotu lian pakhat chu damdawi ina dah ngaiin an sawisa niin an sawi.
Hmarchhak lama Trincomalee Naval Base-ah Mahinda Rajapaksa leh a chhungte chu Colombo-a an chenna in atanga an chhuah hnuah an awm mek nia sawi a ni a, finfiahna erawh a awm lo.
Thawhtanni zan khan politician chenna in 50 vel hal nia sawi a ni a. President Gotabaya Rajapaksa pisa tualah pawh mipui hi an la inhawr khawm reng a, a bân an phut a ni.
Sri Lanka hian kum 1948-a Britain atanga an indan hnua eibara an buai lai ber tawngin mipuiin ni tin khawsakna mamawh an tlachham nasa hle.
An ramin foreign currency reserve an neih a zo va, ni tin mamawh, damdawi leh tuialhthei an chaw lut thei lo.
Sorkar hotute chuan an ram sum hnar ber pakhat, khualzinten Covid hripui avanga an tlawh theih loh chu an buai chhanah an puh a; mahse, mi thiamte chuan sum leh pai hman leh enkawl dan an thiam loh vang niin an sawi ve thung.
Ram hruaitute lakah mipui thinrim an che na
Sri Lanka-ah hian thla hmasa atang khan thil man sang chak leh power khaihlak nasa lutuk avangin mipuiin sorkar laka lungawi lohna hi an lantir tan.
Thawhtanni khan sorkar thlawptute leh duh lotute chu Colombo-a Mahinda Rajapaksa chenna, Temple Trees bulah intibuaiin a hnuah lungawi lohna lantirna hmunpui ber, Galle Face Green-ah an intibuai zui leh bawk.
Police leh riot squad tirh nghal an ni a, sorkar thlawptute chuan police-in tiamchin an siam an pelh avang leh lungawi lohna lantirtute an beih avangin mittui tlakna leh tui laipui hmangin an phuh.
Sorkar laka lungawi loten beih an tawh avang hian an thimrim chu che chhuakin sorkar thlawptute leh rorel lai party MP-te an bei a. MP pakhat chu mipuiin a car an dan avangin mi pahnih kapin amah a inkap hlum zui bawk niin police chuan an sawi.
Zan lamah tharum thawhna thleng zuiin hmun hrang hranga Rajapaksa chhungkaw in, minister leh MP-te inte an hal a. An hal zingah hian Rajapaksa chhungkuain an khua, ram chhim lama Hambantota-a musuem an din pawh a tel.
Social media-a thlalak thehdarhah chuan inten meivap a chan mek lai hian mipuite hlim taka an awm hmuh tur a awm.
President chenna in bula mi pawh hal nia sawi a ni a. A chenna in an beihnaa hliam tuar municipal-a rorel khawl member pakhat chu damdawi inah a thi zui nia sawi a ni bawk.
Mahinda Rajapaksa a bân hnuah sorkar duh lotute hian a thuihhruai eng emaw zatte nena an awm khawmna nia sawi, Temple Trees luhchilh an tum a, in kawta bus an hal a. Police-in hnawh darh nan van lam hawiin silai an hmet puak a, mitttui tlaknain an kap bawk.
Rajapaksa hi a chhungte nen Colombo chhuahsanin Thawhlehni zing khan hmun la hriat lohva an biru nia sawi a ni.
Colombo-ah hian Thawhlehni pawh khan boruak a la tang hle a. Tiang leh rod keng tam takin thlawhna tumhmun panna an dang a, police leh venhim hna thawktu dangte an tam hle bawk.