Aizawl: Kum 2017-a Chalrang khaw tlangval Lalruatmawia thattua puh PC Sanghluna (53) s/o PC Rohlira, Chalrang chu dam chhung lung in tang tura hrem a ni.
PC Sanghluna hrem a nih dan tur hi nimin khan Champhai district & Sessions Judge Liansangzuala’n a ngaihtuah a, thattu ni ngeia ngai thiam loh chantir a lo nih tawh angin hrehawm taka dam chhung lung in tang turin a hrem ta a ni.
Kum 2017, March ni 12 tlaiah Chalrang khaw mi, Lalruatmawia chu an lenna atangin koh chhuah a ni a, a pumah chemte hmanga vih niin, hemi hnu hian a thi zui nghal.
A vittu ni ngeia hriat leh puh, PC Sanghluna hi tlan bo nghalin Khawzawl Police kutah a inpe zui a, Khawzawl Police chuan tualthah thubuai an ziaklut.
Court chuan thuhretu hrang hrang kovin tualthattua puh pawh thu zawhfiah a ni a, finfiahna chi hrang hrang atanga a lan danin court chuan PC Sanghluna hi tualthattu ni ngeiah a ngai a, April 6, 2022 khan thiam loh a lo chantir tawh a ni.