Bungkawn hmeichhe team-in tha takin Zothan Autoworks Pro Volleyball League-ah bul an tan a, Thawhlehni zanah 3-0 in Bethlehem Vengthlang lakah an chak.
R Dengthuama Indoor Stadium, Mualpuiah F. Lalparmawii hovin Bungkawnin mittlung takin an khel a, 2019 final a Durtlang laka an tlawm hnua an inlan leh hmasak berah 25-11, 25-12, 25-23-in Bethlehem Vengthlang an hneh.
F-i’n point 17 hmu in vawi sarih tisual mahse mimalin a langsar fal a, D3 Business Player of the Night lawmman a dawng. R Malsawmtluangi’n point 10 thawh bawkin point hnih a hloh a, Bungkawn team an chak theih nan an thawh hlawk.
Bethlehem Vengthlang in Pro Volleyball hnuhnung bera player tha ber Lalmuanpuii hovin khel mahse beisei an pha lo va, bul an tan that loh hnuah an insiamtha thei tawh lo.
Set hmasa pahnihah Bethlehem Vengthlangin F-i ball vuak an dan theih loh bakah Sawmi’n awmze neiin a khel a, Bungkawn an chungnung a, hneh takin inkhel an awpbet.
Set thumnaah Muani leh Laltluangzeli’n Bethlehem Vengthlang tan beiseina thar siamsakin tlang thei mai turin 22-20-in an sang hman.
Hun pawimawhah Bungkawn an hriam a, ho angreng taka Bethlehem Vengthlangin point hloh thin an tuar bakah Muani’n vaw sualin 24-23-in Bungkawnin an lehpelh a, tang zui lovin an tlang nghal.
Bethlehem Vengthlang tan team fuih phur thei khawpa khel tha an awm lo va, Muani’n point 11 hmu mahse 10 a hloh a, Tluangzelin point sarih thawhin vawi ruk a tisual a, Flora Lalrinmawii’n point paih nei lovin vawi li a hmu na a, a langsar tham lo.
Bungkawn in Zirtawpni zan dar 8-ah Durtlang an hmachhawn anga. Hemi ni chawhnu dar 3-ah Kanan leh Bethlehem Vengthlang an inkhel ve thung ang.