Kum 2019-a Mizorama vaimim ei chhetu pangang chi khat, Fall Army Worm (FAW) puang vak chu tun hnaiah Mizoram hmun thenkhatah a inlar leh.
Thudawn danin Mamit district chhung. Zawlnuam leh Kawrthah rama lo neitute vaimim chu pangang hian a ei chhe leh tan a, nasa taka puang erawh a ni lo.
The Zozam Times zawhna chhangin Mamit-a District Agriculture Officer Zokhuma chuan vaimim chin hmasakhoah tun hnai khan pangang hi hmuh a nih thu a sawi a; mahse, puang vak ang chi chu a la nih loh thu a sawi.
Zokhuma chuan an thurawn angin lo neitute chuan pangangte chu sahbawn sen tui hmangin an thah thu leh tun dinhmunah chuan an la thunun thei tih a sawi.
Tuna fall army worm lo inlar lehna hmuna vaimimte chu sorkarin SEDP-a vaimim chi a semte a nih loh thu sawiin, “Anmahni vaimim chi neih sa an lo chinte a ni,” a ti.
Mizoram sorkar flagship programme SEDP hnuaiah Mizoram hmun hrang hranga lo neitute chu vaimim chi pek an ni a, Mamit district-ah pawh chhungkaw 1,154 chu vaimim chi kg 20 zel pek an ni a, quintal 230 sem ral a ni tawh.
Vaimim ei chhe thei rannung lo inlar leh chungchangah chiaina tur a awm loh thu sawiin deptt pawhin a ngaihven reng a, tuna rawn inlar chu an thunun theih rih thu District Agriculture Officer chuan sawiin, puang vak thei tho a nih avangin deptt thawktute pawh hemi atan an inralrin reng thu a sawi bawk.