Inter Milan in kum 2011 hnua a vawikhatna atan Coppa Italia chawi turin final-ah ‘comeback’ an mamawh a. 4-2 in extra-time ah Juventus an hneh.
Stadio Olimpico a Nilaini zana inkhelah Nicolo Barella chuan minute 6-naah Inter tan goal a khung nghal a. Mahse second half-ah Alex Sandro leh Dusan Vlahovic ten Juventus tan goal khung nghal thuaiin hma an hruai.
Minute 80-naah Inter in penalty hmu in Hakan Calhanoglu chuan an si phurh a sut a. Extra-time khelh ngaiin minute 99-na leh 102-naah Ivan Perisic chuan Inter Milan tan goal a khung a. A vawi riat nan Inter in Italian Cup an chawi.
An tlawm avangin vawi 14 champion ni tawh Juventus in tun season-ah trophy engmah chawi an nei lova. Kum 2010-2011 hnua a vawikhatna a ni.
Inter Milan hian league leh cup ‘double’ la la theiin Serie A lamah point hnihin an hmelma AC Milan an pha lo mek a. Khelh hnih an la hmabak a, Cagliari leh Sampdoria te an la hmachhawn leh ang.
Tun tum hi kum 11 kalta a an champion hnua final an khelh leh hmasak ber a ni a. Goal hmasa ber khungtu Barella hian kum 2015 hnua Coppa Italia final goal rang ber a khung.
Inkhel zawhah hian Juventus defender Giorgio Chiellini chuan kum 17 hnuah club a chhuahsan tur thu a sawi.