Hunthar in semi-final lut turin an dinhmun an siamtha a, Nilaini zanZothan Autoworks Pro Volleyball League-ah 3-0 in Durtlang North an hneh.
R Dengṭhuama Indoor Stadium, Mualpuiah Hunthar in an harsatna su kiangin 25-14, 29-27, 25-17-in hnehna an chang a, Pro Volleyball chanchin a vawikhatna atan Durtlang North lakah an chak.
Lalramnunfela’n vawi hnih champion tawh Hunthar tanpuiin fel fai takin a khel a, D3 Business Player of the Night nih phuin point 12 hmuin point khat chiah a paih a; Haryana atanga an lak luh Gagan Kumar chuan point 17 thawk chhuakin vawi kua a tisual ve thung.
Hunthar hun a inherchhuak
2018 atangin Pro Volleyball-ah Durtlang North an tel a, Hunthar nen vawi thum an insutna niin league inkhelah vek a ni a, 3-2 ve ve a vawi hnih an chak zawn tawhna chhunzawm thei lovin set khat mah la lovin an tlawm.
Durtlang North hian an khelh hmasak berah championship hnuhnung ber 2019 final-a an hneh loh Chhinga Veng Spikers laka an tlawmna chhang letin set thum set hnihin an chak a, Hunthar hmaa hnuhma tha an neih kalpui turin rin hlawh mahse inkhel tan tir atangin an khingpuite an pha lo.
Huntharin an hneh loh thin Durtlang North lakah harsatna an tawh thin an tidanglam a, inelna sangah fiahna an pal tlang thei. Tuichangral an hneh tum aia mittlung zawkin inkhel an thunun a, vawi hnih an khelh tawhah chak ve vein semifinal an hnaih.
Set hmasa berah Hunthar in Durtlang North rinrawl Sagar Malik an dang tha hle a. Set hnihnaah Sagar-a’n a team beisei siamin che tha mahse boruak sangah Hunthar an hriam zawk thin.
Durtlang North an talbuai a, Chhinga Veng an hneh tuma che tha tak Fabian-a la chhuakin captain Zomuanpuia’n thlak mahse nuam ti taka khel tluan thei Hunthar an su nghing zo chuang lo.
Vawi thum champion an tumna puitlin thei tur khawpin Hunthar an inlan a, Gagan leh Rama bakah Densanga’n point 11 hmuin tum hnih chiah a tisual a, Zomuansanga leh Lalnunfela’n hma an sawn bawk.
Durtlang North tan Sagar chuan point 16 hlawh mah se 12 a paih a, Vanlaltanpuia’n point sarih hmuin point li a hloh. Fabiana’n a hma a pha lo lehzual a, point ruk a thawh chhuah chanve a paih a, Lalbiakmuana’n beisei pha lo zelin vawi li a hlap tlak laiin tum thum a tisual.
Hunthar in khelh thum chak zawn tumin kar leh Thawhtanni zanah vawi hnih tlawm zawn mek Chhinga Veng an khelhpui leh dawn a; Thawhlehni ah insiam thar tumin Durtlang North-in Tuichangral an hmachhawn ang.