Aizawl: All Mizoram Farmers’ Union (AMFU) chuan nimin khan general assembly an hmang a. Khuallian niin Agriculture Minister C Lalrinsanga’n a hmanpui a, ram economy a hniam chuan sakhua a him lo tih a sawi.
MC Hall, Durtlang-a assembly neihah minister hian thu sawiin, economy a vei em avangin agricultute a vei tih a sawi a. “Kan ram leh hnam, kan sakhua a himna turin ei leh barah kan intodelh a tul a, kan economy a hniam chuan kan sakhua hi a him lo nghal thei a, kan retheih lutuk chuan kan Kristianna nen a inmil lo a, Pathian nung ringtute hi rethei a awm reng tur kan ni ngawt lo. Kan leilung hman dante hi kan fimkhur a ngai a, kum tina lo hal lo a, hlawk zawk leh tlo zawk kan dap a tul a ni,” a ti.
AMFU President Joseph H Thanzuala pawhin thu sawiin AMFU chu tlawmngai pawl (NGO) a nih angin hma lak harsa mah se theihtawpin hma a lak zel tur thu a sawi a. “AMFU chu NGO a ni a, party tih bik nei lo kan ni a, chutih laiin eng sorkar pawh, thil tha an tihna kawngah chuan theihtawpa kan tawiawm zel dawn a ni,” a ti bawk.
He hunah hian Rochhunga Ralte, ex-MLA leh James Lalramsiama, Agriculture Director te pawhin thu an sawi bawk.
AMFU assembly rorel inkhawmah hian resolution pahnih – Mizoram sorkarin SEDP a duang hi lawmawm kan ti a. SEDP dawng tur thlan chungchangah hian thlei bik nei loin, a dawng thei tur awm mi dik tak thlan chhuah ni se. Tin, a dawngtute pawhin dik tak leh rinawm takin an hna thawk rawh se tih leh, Mizoram sorkar zahawm tak hian AMFU office Aizawlah min ngaihtuahsak se, tihte an pawm a ni.
Mizoram Journalists’ Association (MJA) Gen. Hqrs kaihhruaina hnuaiah kum 2022-2025 chhunga AMFU hruaitu thar thlan nghal neih a ni a. President-ah Chhuanvawra, Rawpuichhip; Sr. Vice President-ah H. Taithuama, Champhai; Vice President-ah mi pahnih, C. Lalzarliana, Khawzawl leh H. Thangtluanga, Serchhip te thlan an ni a. Treasurer atan Lalnungliana, Durtlang te thlan an ni.