Lehkhabu Titi – 2

  • F. Vanlalrochana

Lehkhabu Titi-1-ah khan Mizo Lehkhabu ziak pahnih kan lo sawi tawh a. Tun tumah chuan, hnam dang ziak, sap tawng lehkhabu pahnih chungchang kan sawi ve thung dawn a ni. Kan sawi tawh angin, Sumhmun Titi leh Lehkhabu titi hi kan tikawp thin dawn a. Hun tam zawkah sumhmun titi kan vawrh thung ang.

  1. ASTROPHYSICS FOR PEOPLE IN A HURRY
    (Astrophysics for dummy tihna tluk a ni. A ziaktu Neil De Grasse Tyson-a hian a bei mawi ang reng)

Astrophysics hi ka tuipui khawp a. Pawl 11 ka nih lai khan, A brief history of Time te kha ka lei a. Ka chhiar chhuak thlap.

Astrophysicist zingah chuan Carl Sagan, Stephan Hawkings, Te kha ka ngaihsan leh tuipui ve deuh an ni a. Neil Degrasse Tyson hi chu, Big Bang Theory en thin chuan kan hre awm e. Ani hi a ngaihnawmin, a lo tuipui tlak khawp a. Mi nawlpui ban phakin astrophysics a chhawp hnai ve leh tlat. Hei hi mi thiam tehnaa pawimawh ka tih a ni. A tuipui lemlo leh background nei miahlote hriatthiam phaka thil sawi thiam hi.

Astrophysics han tih chuan physics dan hmanga vanlam chanchin zirna a ni ti mai ila, a kim changlo nain a hriatthiam theih deuh awm e. He lehkhabu hi khawvel lehkhabu lar tling pha a ni a. Chhhiar ngei atana tha ka tih a ni. A man pawh a to lem lo. Carl Sagan-a ‘Cosmos’ hnua mipui tana astrophysics lam lehkhabu nelawm ber a ni hial awm e. “My soul is in that book” te pawh a ti ve a ziaktu hian.

1990 khan, Voyager chuan van boruak zau lam a pan zel a. Carl Sagan-a khan, NASA hnenah, Voyager camera chu lei lama her let a. Lei thla lak tir turin a ngen a. NASA khan an rem ti a. Neptune zawn a thlenin lei lam thla chu a rawn la ta ni…Tyson-a hian ‘Earth’s first ever selfie’ a tia lawm. Chumi thlalak atang chuan, Carl Sagan-a ‘pale blue dot’ titi kha a lo chhuak ta a ni.

Tyson-a hian a sawi uar em em chu, kan chenna khawvel hi universe-ah hian kan tet em em zia thu hi a ni. He thil hi a pawimawh khawp mai. Kan chenna lei hi kan solar system-ah bik pawh hian te tak a ni. Pathian lakah phei chuan kan te lutuk. Pathian laka hel tham pawh hi kan ni lo.

Kan universe chanchin hre tam ila. Kan chapo lo deuh mai thei a ni. Kan thu lo hlir hian thil hi a thleng a nia…

  1. LONG WALK TO FREEDOM
    Long Walk to Freedom tih hi Nelson Mandela’n ama chanchin a ziahna lehkhabu hming atana a hman a ni a, Kum 1995 khan Little Brown & Co chuan an ti chhuak a ni. He lehkhabu-ah hian a naupan laite, a rilru lam thanchhoh dan, a lehkha zirna leh Kum 27 zet tan in thim a luah dan te a ziak a. A lehkhabu bung tawp berah hian Politics-a a invawrh kan chhoh dan te,tin, Apartheid chu ala reh lo a, South Africa-ah harsatna a la thlen zui zel nia a hriat dante a ziak a ni.

A CHHUNGTHU TLANGPUI
A lehkhabu bul lamah hian, Mandela hian a naupan laia a khawsak dan te, a tleirawl chhuah chhoha South Africa rama a nunphungte, Thembu lalchhungkaw thisen kai a nih dante a ziak a. A naupan lai chuan Rolihlahla hming a pu thin a, chu chu a mawl thei ang bera sawi chuan “Thingzar thliak,” tihna a ni a, “Buaina siam ching” sawinan a hming chu an hmang thin bawk. ‘Lalbuaia’ a nih ve chu.

Mandela chuan Thembu College,Clarkebury an tih maia lehkha a zir dante, a hnu lamah Sikul strict em em mai Healdtown school a luh chhoh dan te a ziak a, he sikulah hian naupangte’n tihtur ruahman sa chu khawng takin an zawm thap thap mai a ni. University of Fort Hare-a a lehkha zir laite, dan lama a eizawn chhoh dan te pawh a ziak lang bawk.
A lehkhabu hlawm hnihnaah hian Mandela chuan,Apartheid-in South Africa ram politics leh khawtlang nunphung a nghawng dan te a tar lang a,Politician Daniel Malan, African ho zalenna ti cheptu, Apartheid bultantuin, mi a rilru a hneh dante a tarlang bawk a.

Kum 1950 khan Mandela chuan African National Congress a zawm a, Apartheid dolet tura rawlrala an chet dante a ziak lang a ni.

Kum 1961, khan Mandela chu nuar tura mipuia fuih avangte, passport hmang loa ram a chhuahsan avangtein kum nga chhung tang tura a chungthu rel sak a ni a. Hemi hnu lawk hian a chungthu rel sak that leh a ni a, “Rivonia Trial,”n an tihah chuan Justice Dr. Quartus de Wet, an damchhung lungin tang turin a chungthua bti tlu a, hetah hian a nihna takah chuan tih hlum theih a ni (p. 159)
Mandela hian Robben Island leh Pollsmoor Prison a a tan lai chanchin a ziak lang bawk a. A tan chhung kum 27 afrikan mihang ve bawk, tan in vengtute tihduhdah a tuar a, hna rim tak tak a thawk a, pindan chep lutukah zan tam a riak a.

Ama chanchin ziaktu Anthony Sampson, ang lo takin Mandela chuan Jail enkawltu James Gregory chu mi tangte thian a siam der angin a puh ve lo a ni.
Gregory-a lehkhabu Goodbye Bafana chuan Mandela chhungkaw nun a thai lang a, Gregory chu Mandela mimal thian hnai tak angin a tarlang bawk.

Mandela: The Authorised Biography, tih bua a landan chuan Gregory-a hna chu a hnu lama South Africa President lo ni ta lehkha dawnte lo endik chu a ni; chu ta tang chuan Mandela mimal nun tam tak a hriat belha, a lehkhabu ziahnan tangkai taka hmangin sum tam tak a lalut ta a ni, chu a lehkhabu chu a chunga kan sawi, Goodbye Bafana chu a ni. Mandela chuan amah a rintawkna bawhchhia Gregory-a’n chutiang a lehkhabu a thil tam tak a phawrh avang chuan khin a tum thut thut nghe nghe a.

Long Walk to Freedom tih buah hian Mandela chuan Gregory chungchang chu heti hian a sawi, ‘Kei chuan chuti tehchiamin ka hre chiang lo, ani erawh chuan kan lehkhathawn dawn leh thawn chhhuah te chu a chhiar vek avangin min hrechiang hle a ni ’ a ti

A tan hun tawp dawn lam chuan, Mandela chuan South African president, F.W. de Klerk, nen an inkawm a, a tang pawh 1990 khan chhuah a ni ta a ni. A thianpa Anthony Sampson ang lo takin, Mandela lehkhabu hi chuan de Klerk a hunlai, 1980 leh 90 chho vela tharum thawhna hluar vel chu a ziak ve duah lem lo a,Khatih hunlai a a nupui Winnie Mandela in khang thisen chhuahnaa a mawhphurna pawh a ziak hek lo. Mandela chu kum 1994 khan South Africa ram president a lo ni chho ta a ni.

Mandela chuan a lehkhabu hi “Ka fate paruk, Madiba leh Makaziwe (Ka fanu upa ber) zalenna hmun ropui zawk khua leh tui ni ta te, leh Makgatho, Makaziwe, Zenani leh Zindzi, an mi hmangaihna leh tan tlatna, ka hlut em em te; Ka tu te 21 zet leh ka tu chhuan pathumte hlimna sangtak min pe tute; leh ram leh hnam tana ka thawhpui te, ka thiante leh ka South African puite zawng zawng an rawng ka bawlsak te ,an huaisen, tumruhna leh ram leh hnam hmanaihna, chakna thar ka neih phah thinna te,” te tan a hlan a ni.

He lehkhabu hian kum 1995 khan Alan Paton Award a dawng a, Tawng chi hrang hrangin lehlin a ni tawh a, Afrikaan tawng hrang hrangin Antjie Kroga’n a letling bawk a ni.

TLANGKAWMNA: Lehkhabu chhiar uar ngaihthu hi ka sawi ve ta fo. Ka la sawi leh fo pawhin ka ring a. Lehkhabu chhioar hi a pawimawh a. Ka nunah a bet tlat tur a ni. Chhiar tam a tha a, chhiar zau erawh a pawimawh. Thawnthu chauh mai chhiar mi kan nih chuan, kan nunah awmzia a neih dan a ropui vak dawn lo a ni. Thawnthute, poetry te, thawnthu ni lo, mi ropui chanchinte, hnam chanchinte, khawvel inlumlet dan chanchinte, Pathian thu zir zauna lamte nen chhiar a tha. Eng ang mi pawh ni ila, eng hna pawh thawk ila, lehkha chhiar kan thlahthlam loh a tha. Kan sawi tak angin, kan nunah kan beh tir tur a ni ang.

Leave a Reply

Your email address will not be published. Required fields are marked *

error: Content is protected !!