Vaimim eichhetu a inlar leh hluai mai ang em?
Kum 2019 khan vaimim eichhetu pangang chi khat Fall Army Worm (FAW) chu a puang vak mai a, loneitu tam tak an mangang a, an vaimim eitlak lohin a chhuah phah nual bawk. Hun rei fe a reh tawha ngaih a nih hnuin tun hnai hian he vaimim eichhetu pangang nia ngaih hi a rawn inlar thar leh a, loneitu tam tak an mangang chho tan leh tawh hle.
He vaimim eichhetu (FAW) nia ngaih hian Mamit district chhung Zawlnuam leh Kawrthah rama lo neitute vaimim chu a ei chhe leh tan a, nasa taka puang erawh a ni lo. Sorkar lam atanga ngaihsak thuai thuai nghal erawh an ngai hle. A nasat hnu chuan awmzia a awm tawh lo tih hrerengin hmalak vat vat ni mawlh teh se.
Vaimim ei chhe thei rannung lo inlar leh chungchangah chiaina tur a awm loh thu sawiin deptt pawhin a ngaihven reng a, tuna rawn inlar chu an thunun theih rih thu a inlarna District Agriculture Officer chuan sawiin, puang vak thei tho a nih avangin deptt thawktute pawh hemi atan an inralrin reng thu a sawi bawk.
District dang dangah pawh a kang kai lovang tih a sawi theih loh a, chuvang chuan tun atanga theihtawp chhuaha kan lo inralrin thiam a, harsatna nasa zawk kan tawh hma ngeia sorkar leh loneitute lam pawh kan inpawh tawn lehzual a ngai awm e. Tuna vaimim eichhetu hi FAW a lo ni kher lo pawh a ni thei a, a ni emaw, ni lo emaw a invenna leh tih rem theihna tur kawng kan lo zawn nghal thuai thuai a tul hle.