Hnam humhalh nan Mizo Tawng

  • PC Thang Zikpuia

Kan thupui hi ‘Hnam Humhalh Nân Mizo tawng’ tih a ni a, chipchiar taka sawi zau hman a ni dawn lo a; chuvangin, a pawimawh nia ka hriat ang ang ka han sawi lang ve zawr zawr ringawt mai dâwn a ni. Kan thupui atang hian mi tam tak rilruah chuan, “Hnam humhalh nân Mizo tawng chuan tangkaina eng nge a neiht” tih zawhna hi a lo awm nghal maithei a; chuvangin, Mizo tawng pawimawhna hi tawi tê têin han tar lang hmasa lawk ila a tha àwm e.

  1. Hnam chanchin (history) min vawn himsaktu a ni:
    Mi thiamte chuan ‘tawng’ hi hnam chanchin (history) vawng himtu angin an sawi thin a, hei hi a dik hle ni pawhin a lang. Entir nân: Mizote hian ‘tawng’ hi lo nei ve miah lo ila, zaizir leh mitmei ringawta inbe thin hnam ni ta ila chu kan pi leh pute hun atanga kan hnam chanchin kha inhlan chhawn lohin a boral zel ang a, hnam chanchin (histiory) sawi tur pawh nei ve lo, ‘hnam boral’ kan ni der mai dâwn tihna a ni. A chhan chu: zaizir leh mitmei ringawt chuan thu inhlan chhawn zel a harsa dawn a ni.
    Nimahsela, hnam mawl tak kan nih lai atang tawh khân Mizote hian mahniin ‘tawng’ hi kan lo nei daih tawh a. Keimahni tawng ngeia thu kan inhlan chhawn zel theih avangin hmanlaia kan hnam chanchinte kha bo pil mai lovin kan inhrilh chhawng zel a; chuvangin, kan pi leh pute hun atanga kan hnam chanchin tam tak kha vawiinah hian sawi chhawn tur kan lo neih theih phah ta a ni.
    Chutianga hnam chanchin inhlan chhawn zel nâna hmanraw pawimawh chu a nih avangin, “tawng hi hnam chanchin vawng himtu a ni,” tia mi thiamte’n an lo sawi thin hi a dik hle a. Khawvelah hian hnam ropui nia kan ngaih leh hnam ding chhuak anga kan ngaih apiangte hian mahni hnam chanchin (history) sawi tur an nei thui bik ni te pawhin a lang a; mahni hnam chanchin sawi tur pawh nei ve lo chu hnam boral an ni thuai mai thin a ni àwm e. Hei vang hian Mizote pawh hian kan hnam chanchin kan inhlan chhawnna pawimawh, kan hnam chanchin min vawn himsaktu kan ‘tawng’ hi a hlutzia hria a, humhalh chunga kan chawi lar zual zel hi a tul hle a ni.
  2. Hnam nun phung (culture) min vawn himsaktu:
    Mi thiamte chuan ‘tawng’ hi hnam nun phung (culture) vawm himtu angin an sawi thin bawk a. Khawvel changkang zelah hian Mizote pawh hi kan khawsak dan leh kan nun phung a danglam ve ta hle a. Hmanlaia kan pi leh pute hun laia kan hnam nun phung kha tam tak kan kalsan tawh a, naupang lehzualte phei chuan ‘zawlbuk’ awm hun laia kan hnam nun phung te kha kan hre pha tawh lo hial a ni; amaherawhchu, khang kan pi leh pute hun laia kan hnam nun phung, a taka kan hriat phak tawh loh tam tak kha ngawi renga min lo vawn himsaktu chu kan ‘tawng’ bawk hi a ni leh a.
    Entir nan: ‘Hmeichhia leh chakaiin sakhua an nei lo,” tih tawngkam kan lo neih te hi a awmzia sawi fiah dawn chuan hmanlaia kan hnam nun phung kha sawi lan thar a ngai thin a. Kan pi leh pute hunah kha chuan Zo hnah thlak zinga hnam peng hrang hrangte hian mahni theuhin ‘sakhua’ kan nei thin nia a sawi a ni a. Sakhaw hran nei zingah Ralte nulain Lusei tlangval kha pasala a neih chuan, a pasal Lusei sakhua kha a be ve nghal mai thin a, Lusei nulain pasal atana Ralte tlangval a neih pawhin, a pasal Ralte sakhua kha a be ve nghal mai thin bawk a. Chutianga hmeichhiain an pasalte sakhua an tawm ve mai thin avang chuan hmeichhiate chu sakhaw nei ve lo anga ngaih an lo ni thin a.
    Chutiang deuh bawk chuan chakai pawh hian hmanlaia kan pi leh pute sakhaw thilah khan pawimawhna an nei ve lo anga sawi a ni a. Pi leh pute sakhaw thilah reng rengah kha chuan sa dangte chuan pawimawhna an neih laiiin, chakai erawh chuan pawimawhna a neih ve loh avangin, hmeichhe sakhaw nei lo nena sawi kawpin, ‘hmeichhia leh chakaiin sakhua an nei lo’ tih tawngkam hi kan lo neih phah ta a ni.
    Hetiang hian, kan tawnga ‘tawngkam’ kan neih tam takte hi an awmzia kan sawi fiahna lamah hian kan pi leh pute hun laia kan hnam nun phung bo pil mai tur tam tak kha bo pil mai lovin thangtharte hriatah sawi lan thar a lo nih phah leh ta thin a. Chutiang chuan kan hriat hauh lohin, ngawi rengin kan ‘tawng’ hian kan hnam nun phung, kan culture hi mi a lo vawn himsak reng mai tihna a lo ni.
    Khawvel hnamah hian mahni hnam nunzia leh mahni hnam culture hloh tawh hnam chu ‘hnam bo’ leh ‘hnam dazat’ an ni tawh thin a. Chuvangin, Mizote pawh hian ‘hnam bo’ leh ‘hnam dazat’ kan nih mai loh nan kan ‘culture’ min vawn himsaktu kan ‘tawng’ hi a hlutzia hria a, a boral mai loh nana theih tawpa kan hum him hi a tul hle tihna a ni.
  3. Kan nihna (identity) min pho lansaktu a ni:
    Mizote hian mahni hnam tawng bik hi nei lovin Chinese tawng emaw, Bangali tawng emaw hi hman tawm ve ta ringawt ni ila chu khawvel hmaah hian ‘Mizo’ kan nihna hi pho lan ngaihna a vang hle maithei a; nimahsela, mahni puala ‘tawng’ kan lo neih ve avang hian kan ‘tawng’ hian kan nihna, kan identity min pho lansak ta thin a ni.
    Khawvel changkang zelah hian Mizote pawh kan khawsak phung a changkang tawh a, kan incheina leh kan hmel te pawhin hnam changkangte rual a pawl pha ve vek tawh a. Social media kan tih mai, internet vela nula leh tlangval thlalak kan lo hmuh thinte pawh hi, an incheina leh an hmel atang mai chuan Mizo nula leh tlangval an nih leh nih loh pawh keini ang duang tan chuan hriat hran mai harsa khawp a ni hial tawh a ni.
    Nimahsela, hengah pawh hian ‘Mizo’ kan nihna, kan identity min pho lansak thintu chu kan ‘tawng’ bawk hi a ni leh a. Kan nula leh tlangval hmeltha tak takte’n social media-a an thlalak an han pho chhuah a, an hmel atang ringawta Mizo an nih leh nih loh pawh hriat loh turte khan, an thlalaka ‘Mizo tawng’ ngeia thu an rawn ziah chuan ‘Mizo’ an ni tih kan lo hre thei nghal ta mai thin a. Hetiang hian, hmel atanga kan nihna kan inhriatsak theih lohnaah pawh kan ‘tawng’ hi chuan Mizo kan ni tih hi min pho lansak ta thin a ni. Chuvangin, kan hnam nihna, Mizo kan ni tih min pho lansak a, kan nihna (identity) min vawn himsaktu a nih avang hian kan hnam tawng, ‘Mizo tawng’ hi a hlutzia leh a pawimawhzia hi hria a, a dazat mai loh nana a humhalh kawnga tan kan lak zual zel hi a tul ta bawk a ni.
    Tichuan, heng kan han sawi tak point thum atang chauh pawh hian ‘Mizo tawng’ hi kan hnam chanchin (history) min vawn himsaktu a nih dan te, kan hnam nun phung leh ziarang (culture) min hum himsaktu a nih dan te, kan nihna (identity) min pho chhuahsak thintu a nih dan te chu a tlangpui kan tar langah inngai ila. Heng kan han sawi lan tak atang chauh pawh hian ‘Mizo tawng’ hi ‘hnam humhalhna’ hmanraw pawimawh a nih dan chu a tlangpui tal chu a lang pha ruakin a rinawm a; heng atang hian ‘hnam hum him nana Mizo tawng pawimawhna’ hi sawi belh tur tam tak a la awm thei bawk ang a. Chung zinga pawimawh zual nia ka hriat vete chu ka’n tar lang leh lawk ang a.
  4. Hnam min phuar khawmtu a ni:
    Mi thiamte chuan ‘tawng’ hi hnam phuar khawmtu ang hialin an sawi thin a; tawng inang hmangtute chuan culture pakhat an intawm thin ti zawng te pawha sawi thin a ni a. Ram khata chengho pawh hi ‘tawng’ a dan chuan kan in-unau hlei thei lo a, ‘tawng’ khat kan hman ho erawh chuan kan inti unau thuai thei thin thung a ni.
    Entirna mawlmang deuh hlek han sawi ila, ‘Balbel’ in sang satute pawh kha tawng khat an hman lai kha chuan lungrual takin an thawk ho thei a; amaherawhchu, an tawng a lo hran a, tawng an inhriat tawn hleih theih tak lovah kha chuan an darh zo ta mai nia sawi a ni a. Heta tang ringawt pawh hian ‘tawng’ hi hnam inpum khattirtu leh hnam min phuar khawm nghettu a nihzia chu a lang thei mai awm e.
    Hetiang hian Zo hnah thlak chi peng hrang hrangte pawh hi ‘tawng’ kan inhriat tawn loh telh telh chuan kan inhlat tawlh tawlh ang a, nakin lawkah phei chuan unau kan ni tih pawh inhre mang lovin kan inhloh hlen mai ang tih te pawh a hlauhawm a; chuvangin, zo hnah thlak chi peng hrang hrangte hian mahni chi bil tawng chu nei hlawm mah ila, tawng khat, tawng intawm (common language) kan neih hi a tul a, chumi hmanga kan inphuar khawm lehzual deuh deuh chu a ngai ta niin a lang.
  5. Mizo tawng hi kan tawng intawm a ni:
    A hmasain, ‘Mizo’ tih hi tawi tein han sawi lawk ila; ‘Mizo’ tih hi zo hnah thlak chi peng tute hnam bil hming emaw kan chhawm a ni lo a, zo hnah thlak chi peng hrang hrangte inchhun khawmna hming atana kan nihna hming thar intawm a ni a. ‘Mizo’ tihah hian zo hnah thlak chi peng hrang hrangte hi kan tel vek a ni tih hi hre hmasa ila a tha awm e.
    Chutiang bawkin, tuna ‘Mizo tawng’ kan han tih tak pawh hi Lusei tawng bik a ni tawh lo a, Lusei tawng bakah Hmar, Lai, Mara, Ralte, Pawi leh zo hnah thlak chi peng hrang hrang tawng inchawh pawlh a ni tawh a. Entir nan: Zo hnah thlak chi peng hrang hrangte hi ‘Hmar’ tawngin emaw, ‘Pawi’ tawngin emaw, ‘Lai’ tawngin emaw kan inbe vek thei kher lo ang; nimahsela, kan tawng intawm ‘Mizo tawng’ erawh hi chuan kan inbe thei deuh vek niin a lang. Chuvangin, ‘Mizo’ tihah hian zo hnah thlak chi peng hrang hrangte kan inchhung khawm ta ang hian, ‘Mizo tawng’ kan tih pawh hi zo hnah thlak chi peng hrang hrangte tawng intawm, kan ‘common lamguage’ a ni tih hi kan pawm tlan a, he kan tawng intawm hmanga kan insuih khawm ngheh deuh deuh hi a tul ta a ni.
    Chuti a nih loh a, mahni chi bil tawng theuh dah chungnun kan tum theuh mai chuan ram khatah awmin hnam khat angin leng ve mah ila, tawng hrangin min daidang ru them mai dawn tihna a ni a; chuvangin, zo hnah thlak chi peng hrang hrangte hian keimahni chi bil tawng theuh hi hum him chungin leh, chhawm nung zel chung siin, kan chi peng tawng hrang hrang luan khawmna ‘Mizo tawng’ hi kan hnam min phuar khawmtu atana kan hman a pawimawh ta a; chutiang tur chuan kawng hrang hranga hma kan lak ho pawh a tul hle a ni.
    Zo hnah thlak chi peng hrang hrangte hian mahni chi bila dam khawchhuak tura a hrang theuha kan beih âi chuan, ‘Mizo hnam’-a ding chhuak tura kan thawh ho thiam a tul zawk niin a lang a. Chumi atana kan beihna kawngah chuan kan tawng intawm, kan common language hi kan vaia kan dah pawimawh a tul ta bawk niin a lang a. ‘Mizo hnam’ humhalh nana ‘Mizo tawng’ kan humhalhna kawngah hian hma lakna tur pawh kawng hrang hrangin sawi tur a tam thei ang a; a pawimawh zual nia ka hriat ve tlem ka’n tar lang ve leh lawk ang e.
    1) Eight schedule-a Mizo tawng thun:
    UNESCO chuan khawvela tawng boral hlauhthawnawm zuala awmte a tar lan zingah ‘Mizo tawng’ hi an telh nia sawi a ni a. Hei vang hian ‘Mizo tawng’ hi a boral a, kan hnam a boral ve nghal mai loh nana hma lakna chi khat atan kan mi thiamte chuan ‘Mizo tawng’ hi ‘eigth schedule’-a telh a nih ve theih nan hma an la mek reng a; hemi chungchangah hian Zo hnah thlak chi peng hrang hrangte hian ‘Mizo tawng’ hi kan vaia kan tawng intawm a ni tih kan hriat a, hemi kawnga hma latute hi inthurual taka kan theihna zawn theuha kan lo puihbawm ve a tul niin a lang.
    2) Chi peng tawng seng luh tam:
    Kan sawi tak ang khan ‘Mizo tawng’ kan tih tak mai hi Zo hnah thlak chi peng hrang hrangte’n kan tawng intawm a ni tih hi pawm thiam ila, he kan tawng intawm, kan common language-ah hian Zo hnah thlak chi peng hrang hrang tawng hi tun aia tam hi seng luh belh ni sela, chung chu a hman lar zui kawngah tan la zual zel bawk ila; hemi kawngah hian Mizo Language Development Board (MLDB) lo ding ta hian hma an rawn lak theih ngei pawh a beiseiawm a ni.
    3) Mizo tawng tih hausak dan ngaihtuah:
    Mizo tawng tih hausak dan kan ngaihtuah a ngai ta hle a. A chhan chu: kan ni tin khawsaknaa loh theih loha hnam dang thil siam hming, hnam dang tawnga kan sawi loh theih lohte avang hian kan tawng hi hnam dang tawng nen a inpawlhsawp nasa em em tawh a. Hengah hian hnam dang tawng, mahni tawng ang maia kan lo leklam tawhte hi chu Mizo tawng atana seng luh dan kan ngaihtuah mai a ngai tawh niin a lang a; engtin nge Mizo tawng atan kan seng luh ang tih chungchangah hi chuan Mizo Language Development Board (MLDB) bawk hian thiam takin hma a rawn la thei se a lawmawm ngawt ang.
    4) Mizo tawng hman uar a tul:
    Sap tawngin Mizo tawng a pawlhsawp nasat tawhzia hi chu kan hre theuh ang a, hetiang zel hi a nih chuan tun atanga kum 50 a vei leh meuh chuan ‘Mizo tawng’ tia sawi tur pawh nei lovin, Sap tawngin ‘Mizo tawng’ hi a chim ral thei mai ang tih a hlauhawm ta hial a. Chuvangin, Mizo tawng hman uar a pawimawhzia kan hriat thar zel hi a tul hle a. TV-a thu puanah te, lehkhabu leh chanchinbua kan thu ziahah te, sawrkar leh kohhran lehkha pawimawhah te, pawl hrang hrang thu chhuah ang chi-ah te, a theih ang anga Mizo tawnga sawi leh ziah theih chin chu Mizo tawng ngeia sawi leh ziah hi kan uar a tul hle a ni.
    5) Mizo tawng dik ngaih pawimawh:
    Mizo tawng dik hi kan ngaih pawimawh a tul hle bawk a. Culture inthlak milin tawng hi chu danglam ve bawk mah sela, Mizo tawng hian a orginality a hloh tur a ni chuang lo a, ama kal phung dik pangngai hi a chhawm reng tur a ni a. Chumi chungchangah chuan thumal kan hman dan te, tawng kau chheh kan chelek danah te hian Mizo tawng dik hi kan inzirtir uar deuh deuh a tul a. A bik takin, a ziaha ziah dan chungchangah phei hi chuan ziah dan dik hi kan ngaih pawimawh lehzual a ngai ta bawk a. Sap tawng kal phung entawn a, Sap tawng thumal antir tuma Mizo tawng kan lo ziah mai mai thin te hi a dik loh dan bih chian a, chuta tang chuan Mizo tawng hi ama grammar kal phung mil ngeia dik taka kan chin fel ve hi a hun ta hle a ni.
    Tlang kawmna:
    Aw le, kan han sawi tak chin atang chauh pawh hian ‘Mizo tawng’ hi ‘Mizote’ tana a pawimawhzia chu a tlangpui talin kan tar lang ve-ah inngai ila. Mi thiamte chuan ‘tawng’ hi a boral tawh chuan ‘hnam’ pawh a boral ve nghal thin niin an sawi a; chuvangin, kan ‘tawng’ a boral ruala kan ‘hnam’ a boral ve nghal mai loh nan ‘Mizo tawng’ hi kan humhalh a ngai tihna a ni ta a. Chumi kawnga tan kan lakna tur chu kawng hrang hrang sawi tur a tam thei hlein a rinawm a; nimahsela, chipchiar takin chu lam chu kan sawi kim sen a nih rih si loh avangin, kan sawi tak chin tlang kawm nan: kan ‘hnam humhalh nan Mizo tawng’ hi humhalh ila, a ti dazat theitu tur lakah hum him ila, a tih changtlun leh tih hma sawnna tur kawngah theih tawpin tan i la ho zel ang u tih hi ka sawmna che u a ni e.

Leave a Reply

Your email address will not be published. Required fields are marked *

error: Content is protected !!