North Korea chuan an ram chhunga Covid-19 kai an awm ve ta tih puangin ram pumah inkharkhipna khauh tak an kalpui nghal.
Sorkar chanchinbu chuan an khawpui, Pyongyang-ah Omicron a darh niin a tar lang a, a kai zat erawh a tar lang tel lo.
North Korea hian ram dang atang pawhin hri leng laka invenna pek tum awm mah se a vaiin an hnar fithla.
Covid chu ramri kharin an ramah an luhtir lo thei niin an inngai a, tuna mi hma zawng hian sorkarin a kai chhinchhiah an la nei lo va; mahse, mi thiamte chuan rei tak ata tawh a kai an awm ve ngei erawh an ring.
Ram pawn lam atang chuan mi maktaduai 25 zet chengte hnenah vaccine pakhat mah pek an awm loh avangin an dinhmun a him lo nia ngaih an ni a. Vaccine hi AstraZeneca leh Chinese siam, Sinovac pawh nikum khan thawn tum an lo ni tawh a; mahse, anmahni hian an hnar a ni.
An ramah damdawi in leh a hmanrua an neih chhiat bawk avangin mi tam tak chuan an hlauhthawnpui hle bawk.
KCNA chuan an hruaitu, Kim Jong-un-a chuan hri darh mek hi hmeh mih hmak a tum nia tar langin, ‘national emergency’ tiin a tar lang a. Inkhung hran pawh khauh takin an kalpui tih a tar lang.
Covid dan zam tur chungchang sawihova an thutkhawmnaah Kim-a hian a hmai a tuam tih television-ah pawh a lang a, hei hi hmai a tuam vawi khatna ni hiala ngaih a ni a. A hnu lawkah a inphelh zui leh mai bawk.
North Korea hian an rama hri a len loh nan ramri khar hmar chu kal danah neiin a khar hmasa ber pawl pawh an ni a, January, 2020 atang khan an khar a. Hei hian ni tin mamawh an lak luh pawh a tibuai a, ei tur an tlachhamin an eibar dinhmun pawh a hniam phah hle.
Ningani khan KCNA chuan Kim-a hian ‘emergency sang ber’ a puang tih an tar lang a. Hei hian veng bil inkharkhip leh hnathawhna hmuna awm khawm khapna pawh a huam tel.
North Korean chanchin thar puangtu ber hian an khawpuia Omicron variant kai an hmuh hmasak ber hi ni li liam ta kha a nih thu an sawi bawk.
Seoul-a hmunpui nei, NK News chuan Pyongyang veng thenkhata chengte chu ni hnih chhung tal an inkharkhip a ngai dawn niin a tar lang bawk.
South Korea sorkar chuan an thenawm ram chu tuna hri a darh hnuah hian puih an inhuam thu an hrilh leh tawh a. Pyongyang hian a la chhang let lo thung.
North Korea hian hri leng lakah an ram a him tih sawi fo mah se hri a len atang tawhin a luhchilh ve tho nia rin theihna tur thil tam tak a thleng a. Kai tih finfiah lohva kai tam tak an awm nia sawi a ni.
Nikum June khan sorkar chanchinbu chuan Kim-a hian Covid chungchang sawi chhuaktu thuneitute chu a hrem nia sawi a ni a, chanchin kimchang erawh hriat a ni lo.
September thla khan sipai kalrem lâm neihnaah sipaite chuan hazmat suit leh hmai tuamna an inbel a, hei hi mi tam tak chuan Covid a awm a, a darh tur venna atana an tih niin an ngai.
North Korea hi khawmualah South Korea leh China nen inriin heng ramte hi hri leng buaipui nasa an ni a. China phei hi chu tunah hian Omicron vanga buaiin khawpui lian tam tak an kharkhip mek a ni.
g7 summit tel tur thulh
Mi thiamte chuan Pyongyang-in Covid-a an dinhmun an puang hian an ramin nuclear ralthuama inchhek len a tum chu a tihkhawlhkham theih an ring a; mahse, a nih hmel rih loh.
Ningania an ramah Covid kai an awm ve ta tih an puan hnu lawkah pawh ballistic missile ni ngeia hriat chu Sea of Japan-ah an kap chhin leh niin South Korea-a joint chiefs of staff chuan a sawi.
North Korea hian tun hnaiah enchhin an phal lo missile tam tak a enchhin tawh niin a inchhal a, heng zingah hian intercontinental ballistic missile an tih, kum li chuang a lo enchhin ngai tawh loh pawh a tel.
University of North Korean Studies-a professor, Yang Moo-jin chuan Kim-a hian hri leng laka an ram chanchin thiarfihlim nan nuclear hi a enchhin zel a rin laiin Ewha University-a professor, Leif-Eric Easley thung chuan tun maia hlauhawm pawh la ni lo, ram dang sipaite laka invenna buaipui aiin tuna hlauhawm tawh hri chu a buaipui hmasak a ring.