North Korea chuan Covid-19 avangin an ramah thi an awm ve ta tih an puang a, mi sang tel hripui kaite nat anga na enkawl lai an awm bawk tih sorkar chanchinbu chuan a tar lang.
Zirtawpni khan sorkar chanchinbu chuan mi paruk an thih thu leh an zinga pakhat chu Omicron kai a nih thu a puang.
Mi 1,87,000 vel chu an khawsik avanga dah hran leh enkawl an ni tih a puang bawk.
Mi thiamte chuan North Korea-ah hian a hma atang daih tawhin hri hi kai an awm tawh ngei an ring a, thuneitute erawh chuan Ningani khan kai an awm thu anpuang ve chauh.
Omicron variant chu an khawpui, Pyongyang-ah a darh nia sawiin inkharkhipna thupek an chhuah nghal a. A kai zat erawh an sawi lo.
Zirtawpnia sorkar enkawl KCNA news agency-in a tar lan thar lehah erawh chuan hri hi khawpui pawn lamah pawh a darh tawh a. “April thla tawp atang khan a chhan hriat si lova khawsik chu ram pumah a darh chiam a ni,” an ti.
Mi 3,50,000 velin khawsik an nei a, an zinga mi engzat chiahin nge Covid kai tih erawh hriat a ni lo.
Zirtawpni khan KCNA chuan North Korean hruaitu, Kim Jong-un chuan healthcare centre tlawhin ‘ram puma Covid-19 darh mek chu a ngaihven’ niin an puang.
Ningania Covid vanga dan zam tur an sawihonaah pawh Kim-a hian a hmai a tuam tih television-ah a lang a, hmai a tuam hmasak ber ni hiala hriat a ni.
Inkhuahkhirhna khauh tak siam nghalin veng bil inkharkhip te, hnathawhnaa awm khawm tam lohte tih a ni.
Khawvela hripui a len tirh atanga ramri khar tawh an nih avangin hri hi a darh chiam a nih chuan ni tin mamawhah an buai thuai rin a ni a, an ram eibar dinhmun pawhin tuar hle tura ngaih a ni.
South Korea chuan Ningania hri a darh tia an puan hnu lawkah puih an inhuam thu a sawi ve nghal a, Pyongyang erawh chuan a la chhang lo.
North Korea hian a hma khan Covid vanga an inkhuahkhirhna avangin hri lakah an him niin an lo insawi tawh thin a; mahse, hri kai finfiah loh an awm rinna a lian hle a, hna thawhnaa hazmat suit hak an chinte chuan hei hi a tirinhlelhawm hle nia ngaih a ni.
Mipui hlauhthawnpui
North Korea-ah hian mihring maktaduai 25 vel an cheng a, tun thlengin Covid laka invenna dawng an la aw lo va, an damdawi in leh hmanruate an changtlun tawk loh bawk si avangin mi thiamte chuan hri hi a darh chiam ang tih an hlauhthawnpui hle.
Ram dangte chuan nikum khan AstraZeneca leh Chinese siam invennate pek tumin an lo dawr tawh a; mahse, an hnar a. January, 2020 atanga an ramri chuan Covid lakah a tihhim an inbeisei.
Khawualah South Korea leh China nen inriin ram hnihte hi hri vanga buai nasa an ni a. China phei chu tunah hian la buaiin khawpui tam tak an kharkhip a, hetih laia him tlat anga North inchhal hi awih lotu an tam hle a ni.