Oil palm chingtuten Rs. Vbc 21.42 la lut tawh

Aizawl: Mizorama oil palm chingtu kuthna thawktuten an thar chhuah hralhna atangin Rs vaibelchhe 21.42 an la lut tawh.
Kolasib DAO Conference Hall-a Vanlalchhuanga, Deputy Director (Oil Palm) hoa nimina Kolasib district-a oil palm chingtute leh oil palm lam khawihtu official-ten Mizorama oil palm dinhmun zirchianna an neiha tar lan a nih danin oil palm chingtu chhungkaw 10,843 an awm mek thu leh heng mite hian a rah metric ton 39,783 hralh tawhin Rs vaibelchhe 21.42 an la lut tawh a. Mizoram state pawnah a hriak 4,630.178 metric ton hralh chhuah a ni tawh.
Mizorama pil palm dinhmun tar lanah hian oil palm hi central scheme hrang hrang – ISOPOM, OPAE, NMOOP hnuaiah kalpui lo ni tawhin, tunah hian NFSM-Oil palm hnuaiah kalpui mek a ni a. Oil palm chin theihna ram hectare 66,791 a zauah hectare 26,730-ah chauh hma lak a la ni thung.
Vanlalchhuanga, Deputy Director (Oil palm) chuan he hunah hian thu sawiin, khawvelah hriak ei chi man a san chhoh zel thu a sawi a. “India ramin hriak ei chi a leina leh khawvela hriak ei chi thawnchhuaktu lian ber Indonesia ram pawhin ram danga oil palm hriak thawnchhuah a khap tak avangin India ram chuan hriak ei chi-ah harsatna kan tawh mek laiin, hriak ei chi a kan intodelh nan sorkar laipui chuan oil palm-ah nasa takin hma a la ta a ni,” a ti.
Thutkhawm zawh hian Vanlalchhuanga hoin, Bukvannei Oil palm Mill leh Buhchangphai a Oil palm huan thenkhat te an tlawh nghal bawk.

Leave a Reply

Your email address will not be published. Required fields are marked *

error: Content is protected !!