Bungkawn hmeichhe team-in an hma a awm fiahna lian tak an paltlang a, Zirtawpni zan Zothan Autoworks Pro Volleyball League-ah 3-1 in Durtlang an hneh.
R Dengthuama Indoor Stadium, Mualpuiah Bungkawnin set hmasa ber an hloh a, F Lalparmawii’n team chawi kangin 25-17, 25-19, 25-14-in ropui takin an kir leh.
Final a hnai
He hnehna hi Bungkawn tan a hlu a, Durtlang nen Pro Volleyball-a an intawn lehna hmasa berah 2019 final-a an tlawmna tha takin an chang let a, league kal meka vawi hnih an khelh tawhah chak zawnin final luh nawn an hnaih.
Champion lai Durtlang hmabak erawh a hautak sawt hle. Kanan lakah set la lovin an tlawm tawh a, khelh khat an la neihah chak pawh ni se final lut turin set an lak dan leh team dang dinhmunah an innghat tel a, beiseina a sang tawh lo.
Bungkawn tan set thum faia Bethlehem Vengthlang an hneh tuma che tha F-i’n Durtlang lakah point 30 hmuin 14 a paih a, D3 Business Player of the Night-a thlan nawn niin a elpuite lakah a filawr.
Durtlang an tang tluan thei lo
Durtlangin bul an tan fuh a, Lalramliani leh CS Zonunmawii’n awmze neiin an khel. Inel tawk viau chungin Bungkawn an insiam rem nghal mai lo va, league kal meka a vawi khat nan champion laiin set an la.
Set hnihnaah F-i’n inkhel boruak tidanglamin lehlamin tlar hma leh hnung atanga ball a vuak an chelh lo. Bungkawn player dangten inrintawkna neih phahin Durtlang an tlahniam a, set hnuhnung pathumah team leh player khaikhinin an khing zo lo tluan thak.
F-i bakah Bungkawn player-ten team tan tangkai thamin an khel a, R Malsawmtluangi’n point 12 hloh mah se 15 a hlawh a, FP Lalduhkimi’n point riat hmuin tum li a tisual a, Angelli Lalhriatchhungi’n point sarih thawhin point khat chauh a paih a, hlutna neiin a khel.
Durtlang player zingah Rami’n point 12 hmuin vawi ruk a tisual a, Zonuni’n point 10 a hmuh laiin point li a hloh. Anni pahnih bak hlawk thama point hlawh chhuak an awm lo va, captain Lalawmkimi Khenglawt chuan point ruk a hmuh laiin vawi sarih a tisual.
Hmeichhe team paliin vawi hnih theuh khel tawhin khelh khat theuh an la bak a, Bungkawn sang berin tlang tluk an ni tawh.