- P.C. Zosangpuii,
Museum Curator, Mizoram State Museum
May 18 hi khawvel pum puia Museum hrang hrangten a ruala kan hman tlan tura International Council of Museums (ICOM)-in kum 1977-a a puan “International Museum Day” a ni a. Ministry of Culture, Government of India chuan India Zalenna Kutpui (Azadi Ka Amrit Mahotsav) lawmna atan India ram pumah A Week Long Celebrations for International Museum Day buatsaihin May 16 – 20, 2022 chhung hian Mizoram State Museum chu en man awm lovin hawn a ni dawn a. Tin, Museum entuten Museum an tlawh hriat rengna atan Museum-a objects hrang hrang thlalak te, Museum en lai thlalak te Social Media-ah a tam thei ang ber pho chhuak turin min beisei a, heng bakah hian a lemte ziak a, darh zau taka pholang turin min beisei. Chu chuan mipui tam zawkte hnenah Museum hlutna a hriattir dawn a. Ministry of Culture-in Museums Re-Imagined / Museum Memoires a buatsaih hi Instagram-ah post-in #MuseumReimagined hmangin intihsiakna a buatsaih nghe nghe a ni. Heng bakah hian May 18, 2022 Vawiin hian Mizo rimawi hmanrua chi hrang hrangte tum dan / hman dan a taka entir (Practical demonstration) a ni dawn.
Mizoram State Museum hi Multipurpose Museum a ni a. Tunah hian Museum-ah Gallery 6 – Zoology, History Gallery, Anthropology, Ethnology, Textile, Archaeology kan nei mek. India ram state dang atanga mizoram tlawh tura rawn kal te, India ram pawn atanga mizoram tlawh tur lo kalte hian kan hnam nun pholanna Museum hi an rawn tlawh nasa em em a; tin, zirna-in school, college leh institution hrang hrang atangte pawhin an zirlai puitu a tan te Museum hi an rawn hmang thin a. Zir bing neia zirlai (research scholars) engemaw zatin an zirlai puitu atan Museum hi an rawn hmangin an tangkai pui thin em em bawk. Mipuite pawhin kan hnam nun leh kan rohlu pholanna hi a hlutzia kan hre tan viau a, naupang zawkte rawn kalpuiin Museum-a kan hnam nun leh ruhlu awm chu mit ngeiin an rawn hmu thin a. Heng zawng zawngte han hmuh a, kan thlir hian Mizo-te hi kan hnam nun leh rohlu ngaihhlut kawngah leh humhalh zel duhna kawngah nasa takin kan thangharh mek zel tih a lang chiang em em a. A lawmawm hle.
Tunhmain mi thenkhatin Museum hi thil hlui leh thil mak dahkhawmna satliah maiah an ngai thin a. A dikna chin chu awm mahse, tunlai khawvel thang zel leh hmasawn zelah hian chutiang hmanlai ngaihdan ang ringawt chu a ni tawh hauh lo mai. Tunah chuan hnam nunzia – Culture leh Tradition kan hriat theihna bul ber a lo ni ta. Non-formal educational centre pawimawh tak, research scholar-te tan pawha chhen fak awm tak a lo ni ta. Museum hlutna leh pawimawhna kan hriat deuh deuh theihna tura en man chawi lo va Museum en theihna hun siam, A week long celebrations for International Museum Day (16-20 May, 2022) chhung hian
Museum rawn en ngei turin ka sawm che u a ni. Kan sawi tak angin kan Museum hi thil hlui dahkhawmna a nih rualin thil hlui vawn that ringawt hi Museum in a tum ber a ni lo va. Museum chuan rohlu a neihte hmanga mipuite hnena hriatna (knowledge) pek hi a tum a ni a. Museum chu zirna-in a nih angin eng zirna huang (subject)-ah pawh mipuite tana hriatna leh thiamna pek hi a tum a ni.
A tawp berah chuan mahni hnamzia – Culture & Tradition-te kan hlut thiam a, a tha lo apiang kan hnawl a, a tha apiang kan chawisan zel hi a pawimawh tak meuh a. Kan hnam thilte kan hriatchian hmasak a, hnam dangte pawh hrilh thei tur khawpa kan zir chian hmasak a ngai a ni. Chutiang tur chuan International Museum Day kan hman ni-ah kher lovah pawh Museum hi tlawh fo turin ka sawmin ka ngen che u a ni.
Mizoram State Museum-in a tum pakhat chu Mizo nunphung leh nun zemawi te chawi nung zel chung a, thang lo thar zelte hnena kan hnam nun zia leh nunphung ataka hmuh tir leh thiam tir hi a ni a. Ram hmasawnna thang zel leh nunphung danglam zel hian Mizo zia mawi tak mai leh mizo kan nihna lantirtu kan hnam rohlu leh thil hluite min hlat tir tial tial fo thin a. Kan culture leh tradition tam tak a thi tawh a, a thi mek zel. Tunlai thangtharte zingah phei chuan hriat a lawi nei tawh lo an tam tawh ang. Chutiang hun kan lo thlen tawh avangin, kan culture leh tradition dik tak kan lo hriat thar leh theih nan, a sawi a sawi ringawt ni lo, a tak taka mit ngeia hmuh theih turin Museum din a ni a, mipuite tana hriatna leh thiamna pek belh zel a nih theihnan he programme hi buatsaih a ni.
A tawp berah chuan ICOM-in International Museum Day thupui atan The Power of Museums tih a thlang a – Mizo hnam lo dinchhuah zelna tur leh kan hnam inpumkhat zelna turin kan nihna dik kan hriat chian a ngai a, chu kan nihna kan chawilar chuan kan hnam hi hnam ropui takah kan hlang zel dawn a, chu mi atan chuan Museum hian chakna tam tak a pe thei che u a ni. Mahni hnamzia – Culture & Tradition-te kan hlut thiam a, a tha lo apiang kan hnawl a, a tha apiang kan chawisan zel hi a pawimawh tak meuh a. Kan hnam thilte kan hriatchian hmasak a, hnam dangte pawh hrilh thei tur khawpa kan zir chian hmasak a ngai a ni.