Liverpool in Premier League title inchuhna chu season tawp ni a chinfel turin Manchester City nena an inkar an ti zim a. Southampton khelmualah 2-1 in hnehna pawimawh an chang.
St. Mary’s Stadium a inkhelah Reds in goal chhuah hmasa mahse an tho leh a. Season tawp ni ah Manchester City an chesual a, anni in point thum an hmuh chuan an champion thei.
St. Mary’s Stadium-ah Jurgen Klopp-a pawlten an tlawm chuan City an champion dawn tih an hria a, an indraw pawhin City goal difference an that fal avangin champion tluk an ni dawn tih an hria.
Tum angin bul an tan lo ngei bawk a. FA Cup final a Chelsea penalty a hnehtu team atangin player pakua an thlak a, an squad a rim tawh avangin inthlak kual a ngai.
Hei hi Saints tan remchang a ni a, bul an tan that rah sengin minute 13-naah Nathan Redmond chuan goal a khung a, Alisson-a goal-ah a ke ding lamin a pet kual lut mawi.
Mahse Liverpool in ‘Liverpool’ an nih chhan an lantir a, inkhelh dan ngelnghet an neih tlat avangin an chhawr rim loh zawk player-te pawhin danglamna an siam thei a, football hlauhawm an khel.
Minute 27-naah team goal tha an khung a, a hmawrbawktu ah season liamta a loan a Southampton in an hawh Takumi Minamino chuan goal a khung.
Second half-ah 1-1 a ni a, Saints an khelchhe lo. Mahse minute 67-naah Liverpool in an dinhmun ti tha turin goal an khung a. Joel Matip chuan Saints goalkeeper Alex McCarthy save phak lohin an chakna goal a tauh lut.
Manchester City in Etihad Stadium a Aston Villa an mikhual huna hnehna an chan chuan an champion dawn thova, mahse Liverpool in an chetsual chang ranin hahdam a siam lo turin an um ve reng.
Eng nge an sawi?
Liverpool boss Jurgen Klopp chuan an tan champion chu beiseiawm lo mahse thil theih a la nih thu a sawi. “Manchester City in an mualah Aston Villa an khel dawn a, kan tan champion hi thil beiseiawm loh tak a ni. Burnley kan tum dawn a, inhamtan tum an nih avangin a harsa dawn.”
“Mahse football a ni a, kum 2019 a an champion tum khan millimetre 11 lek vang a ngaih theih a ni. Mahse kan champion dawn chuan kan chak phawt a, Aston Villa in point an hmuh a ngai.” tiin a sawi a. Inkhel thlirletin, “Kan beidawng miah lova, hei vang hain season tawp ni hma chu kan beidawng dawn lo. Kan mual a kan inkhel hnuhnung ber tur a ni dawn a, boruak pawh a lian ang.” a ti.
Southampton boss Ralph Hasenhuttl chuan, “Team tha an ni a, han barakhaih pawh kha thil awlsam a ni lo, mahse kan theihtawp kan chhuah a. Nipuiah insiamthatna tur kan ngah hle.” a ti ve bawk.