Halftime-ah point 8 in an hniam zawk a, mahse Miami in mi pakhat an nei. A hun takah Jimmy Butler-a’n NBA Playoffs boruak sangah player tha a ni a, innghahna tlak a nihna a lantir a, 118-107 in Boston Celtics lakah hnehna a chanpui.
Nilaini zingah NBA Playoffs Eastern Conference Finals game 1 khelh a ni a. Butler-a’n Heat tana mawhphurtu chan changin a team a chakpui chiang hle.
FTX Arena a inkhel second half-ah Butler hian point 27 a score a, inkhel pumah point 41 a score. Third quarter tha taka khel Heat hian an dinhmun siamtha in an player chhawr rim thenkhat chhawr thei lo Celtics lakah best of 7 series-ah 1-0 in hma an hruai.
Miami an che hmasa
Conference semi-finals ah Heat leh Celtics ten anni aia rinkai zawk leh tun season a team langsar zawk ve ve an paihthla a. Tun season NBA Finals a khelh tum team te rin loh hlir an ni.
Heat in an team in fak a hlawhna tak bench atanga player tangkai lut thei an ngah chu an chhawr.
Tyler Herro chuan 18 thawhin starting point guard rintlak tak tun season a ni chho Gabe Vincent chuan point 17 a thawh.
Max Strus leh Bam Adebayo ten 11 leh 10 an thawh bawk a. Hnehna an channa tura inkhel kaihruaitu erawh Butler a ni.
“Basketball tha, a nih dan ang tur taka khelh ka tum a, remchang ka hmuh a ball shoot a, nawr a hun a ball luhpui a nawr a, pass tur an awm huna pass mai ka tum. Keimah chauh a ni lova, team anga chak kan ni.” tiin Butler chuan an chak hnuah a sawi.
Miami coach Erik Spoelstra chuan, “Jimmy Butler hi inelna a inpe pumhlum mi a ni a, he league-ah hian basketball thiam tak tak an awm a, ani erawh chu hnehna chang tura mi el thin a ni. Hei hi thil danglam leh inang lo tak a ni.” a ti.
Boston hian an starter pawimawh pahnih Marcus Smart leh Al Horford te an chhawr thei lova. Point 29 score tu star player Jayson Tatum chhawk a game siamtu tur an nei tha tawk lo thin. Jaylen Brown chuan point 24 a thawh.