Aizawl: Myanmar ram buai avanga Mizorama raltlan mi 48 (mipa 36 leh hmeichhia 12)-in nimin khan Civil Hospital, Aizawl-in a tula a hman turin thisen an pe.
Thisen pek tum hian mi 100 chuang kalkhawm mah se harsatna hrang hrang avangin an vaiin an pe thei ta lo a ni.
Mynamar raltlante chuan relief camp hrang hranga awm an nih avangin thisen pek runpui hi DMC, Dawrpui-ah an buatsaih a. A huaihawttuten an sawi danin Mizo mipui, a mamawhtute tana thisen an pek chhan chu Mizoram mipui, tlawmngai pawl, kohhran, political party leh Mizoram sorkar lakah kawng tinrenga an lawmzia an lantirna leh lawmthu an sawina a ni a. An lawmthu sawina chu pawmsak ngei turin Mizorama a tul anga anmahni buaipuitu zawng zawngte an ngen bawk.
Thisen pek runpui huaihawttute chuan Civil Hospital, Aizawl Blood Bank-a thawktute lo dawnsawn danah lawmthu an sawi a. Thisen an pekna tur hmun lo buatsaihsaktu YMA, Dawrpui branch leh kawng tinrenga an mamawh ngaihtuahsaktu Association for Voluntary Blood Donation (AVBD) hruaitute, kawng engkima buaipuitu CYMA leh thisen pe turte hruaikhawmna tur lirthei leh ei leh in tur buatsaihsaktu, C. Laltanpuia (Mosia Agency) te chhungkaw chungah an lawm hle tih an sawi bawk a ni.