Mizoten kan Mizo hla tha zawng zawng ngaihthlak theihna application kan nei ta. Mizo mipuite tana chanchin lawmawm, Mizo rimawi a eizawngte tana thil lawmawm tak ni tur Mizoten kan nei ta. Mizo rimawi ngei ngaihthlak theihna Darbu application chu Zirtawpni zan dar 8 ah tlangzarh a ni dawn.
Darbu hi ‘Music & Audio application’ a ni a, a thlawn a rimawi ngaihthlakna, Mizo zaithiamte album thar hmun danga awm lo lei theihna leh ‘artist’ te kutchhuak leh an bungraw zawrh chhuah theihna a ni.
Rimawi a eizawng Mizoten thahnemngai in an bei thin a, an thiamna han phochhuahna tur ‘platform’ erawh an thawhrimna nena han inhen zo a awm lo fo thin. Chumi kawnga an mamawh chhanna pakhat ni thei turin Darbu hi duan a ni.
Chiang zawkin aw
Darbu siamtuten he app phena an rilru a awm ber chu khawvel sumdawnna kalphung pakhat – freemium model a ni.
Freemium model hi YouTube, Spotify leh a dangte pawhin an hman a ni a. Mipui in a thlawna hla an ngaihthlak emaw video an enna niin a ngaithlatu emaw entu a tam dan a zir a sum hailuh theihna a ni.
He sumdawnna hi khawvel huap a model tha a ni a, amaherawhchu kan ram, mihring tlemte zingah erawh hlawk hleithei si lo a ni thung.
Hlawkna hmu pha khawp a hmang tangkai pawh an tam lova, kawng dang a tam loh avangin rimawi hmanga eizawn hi eizawnna tlak lova ngaihna rilru a len phah thin.
He rilru hian zaimite leh musician te, producer te, hla phuahtute thlengin an hlutna nasa takin a ti tlahniam a. He dinhmun khirh tak atanga kawng dang pakhat a awm nan tiin Darbu hi duan a ni.
Tu tan maw?
- Mizo mipuiten Mizo hla kimchang thei ang bera an ngaihthlak theihna tur; hla hlui leh album hlui te mumal taka dahkhawmna tura duan a ni.
- Mizo rimawi eizawnna atana hmangten hlawkna tha zawk an hmuh theih phahna tura duan a ni a, Mizo rimawi khawvelah hmasawnna a nih ngei beisei in an siam.
- Rimawi khawvel a eizawnna tlak thiamna nei, kal ngaihna hre silo te tana kawng thar a nih nan din a ni bawk.
Eng nge a thatna le?
Darbu application-ah hian thil chi hrang hrang awm dawn mahse langsar pathum a awm. Chungte chu Darbu Library, Darbu Exclusive Release leh Darbu Store te an ni.
Darbu library hi ‘streaming platform’ a ni dawn. Hetiang ang chi – Spotify, YouTube Music, Gaana, te ang tho niin hetah hian Mizo hla tam thei ang ber mipui tan a thlawn a ngaihthlak theihin a awm dawn. Hla thar bakah hla hlui tam thei ang ber ri tha zawka ngaihthlak theih tura ‘remaster’ hnuah dah a ni.
Darbu Exclusive Release-ah hian zaimiten album thar an release a nih chuan Darbu App-ah hian an zuar anga, he app-ah hian a lei theih ang. Darbu a release hla hmundangah ngaihthlak tur a awm dawn lova, copy chhawn theih a ni dawn lo. Hei vang hian album siamtu hnenah hlawkna a kal dawn. Hemi atanga sum lut hi artist-ten 90% an chang a, Darbu in 10% an chang ve ang.
Darbu app hi ‘piracy’, phalna lova lo tihdarh leh thildang laka a him nan ‘encryption’ uluk tak a kalpui a ni a. He app atang hian eng hla mah a lakchhuah theih loh.
Darbu Store-ah hian artist-ten an kutchhuak emaw bungrua eng ang chi pawh Darbu App katlangin an zuar thei ang. Anmahni in merchandise nei tura hma an la thei lo a nih pawhin an duhdan anga design pui in, artist te tana hlawk tur si, a hranpa a an buaipui ngai si lo in Darbu hian a zawrhsak thei dawn bawk.
International shipping partner an neih bawk avangin khawi hmun atang pawhin a lei theih dawn.
Engtin zel?
Darbu hi Mizo rimawi huanga hmasawnna pakhat a nih theih beisei a bul tanna a ni a. A app siamtute pawhin tihchangtlun a, hmalam pan an tum hle.
Hemi kawngah hian Mizo rimawi khawvel a theihtawp lo chhuah thinte nena thawhho kawngahte, artist-te hma ngai zela thil kalpui a nihna turin fimkhur taka kal an tum.
Zirtawpni zanah ‘official’ a tlangzarh a ni anga, tun dinhmunah App Store leh Google Play-ah te iOS leh Android hmangte tan download turin a awm ve ve tawh.
He app hian hmabak thui tak a nei thei a. Mizo rimawi hnuhma tha tak tak dahkhawmna a la ni thei. A thang zel a nih chuan Zo rimawi tana bung thar kaina pakhat a ni thei ang.