Kumin Zothan Autoworks Pro Volleyball League-ah champion tura rinhlawh tawlh tawlh Hunthar Veng an che tha tluan a. Chungnung taka khelin an TNT lakah hnehna an chang.
Ningani zana R Dengṭhuama Indoor Stadium a inkhelah Hunthar in an chetthat an chhunzawm a. Semi-final lut chiang tawh ni mahse an player te thlak kual lovin team tha ber an khelhtir a. An elpui hlun tak Thutak Nunpuitu Team 25-22, 25-20, 25-23 (3-0) in an hneh.
Hunthar in an khelh tawha an chetthat ber ni hial turin an khel a, league vawi li an khelhah chak fai vekin team panga inel zingah an sang ber.
Mimal a point thawk chhuak hnem ber Gagan Kumar chuan D3 Business Player of the Night lawmman a dawn rualin, Huntharin thawh hona leh inpumkhatna tha tak an lantir tluan a, Laldensanga leh Lalramnunfela bakah setter Remsangzuala’n hlawk tham takin team an tanpui.
Vawi thum champion thei tura rin kai ni chungin kar leh Thawhlehni zanah league-a palina nen final luh an inchuh ang.
TNT-in semifinal lut turin point hnih neih belh an mamawh a, tum dang aia inkhairual zawkin player-ten khel mahse inelna boruak sangah an hriam zo lo.
Inhnehtawk tak chungin a bet zawkah an tang tluan a. A hmaa vawi hnih an khelh tawh a langsar fal tak Vanlaltanchhana’n ṭum dang a pha lo va, Zosangzual leh Sadraka Fanai chuan fel fai takin khel mah se team an chawi kang zo bik lo.
TNT-in vawi thum an khelh tawhah a ṭum hnih nan an tlawm a, inrinni zanah Durtlang North hmachhawnin league an khar dawn a, tlang turin hun tha an la nei.