Aizawl: Department of Zoology, Mizoram University-a Developmental Biology & Herpetology Laboratory-a professor, H.T. Lalremsanga leh a research scholar-te chuan state danga an thawhpuite nen Champhai leh Umroi Military Station atangin rultuha species thar hmuchhuakin a hmingah Trimeresurus mayaae tiin an vuah.
Rultuha hi a pianhmang leh DNA zirchian a nih hnuah ni 15.5.2022 khan International Scientific Journal, Plos One chuan a tlangzarh (published) ta a ni.
Prof. H.T. Lalremsanga chuan, “Hetiang Green pitviper-te hi khawvel pum huapah species 51 awmin India ramah 17 record an ni ve tawh thung. Heti hian Mizoram pum huapah rul species 64 record ni tawhin chung zinga species 13-te chu deadly venomous niin mihring tan a tûr (venom) hlauhawm an nei,” a ti.