Golden State Warriors in a zawna vawi thum nan Dallas Mavericks an hneh a. NBA Playoffs Western Conference Finals game 3-ah 109-100 in hnehna an chang.
Warriors tan star player Stephen Curry a langsar a, fak hlawh thin lo team player tangkai Andrew Wiggins a che tha hle bawk.
Point 31 Curry-a’n a score a, a team tana khaipa ber niin assist 11 a nei tel a. Wiggins-a’n NBA Playoffs chanchin a inkhel vawikhat a point a score hnem ber tum ni turin point 27 a score a. Mavericks star player Luka Doncic a ‘dunk’ khum chiang hle.
Warriors tan Klay Thompson chuan point 19 a thawh bawk.
Golden State hian West finals an khelh hnuhnun berin kum 2019 khan Portland Trail Blazers chu 4-0 a hnehin series an la tawh a, naktuk zingah 4-0 a series la thei turin Dallas-ah bawk an inkhel leh ang. NBA Playoffs-ah 3-0 a hiam tawh team tho leh thei hi an la awm lo.
Warriors coach Steve Kerr chuan, “Kan dinhmun awmna hi duhthusam a ni. Helai hmunah kan inkhel a, hnehna kan chang thei hi thil lawmawm a ni.”
“Kan rilruah he inkhel hi a pawimawh a, 2-0 a sang zawk kan nih laia kan han chak leh chiah hi kan tan boruak ti tha zual leh tu a ni dawn.” tiin a sawi.
Mavericks tan Doncic-a’n point 40 leh rebound 11 a la a, Spencer Dinwiddie chuan point 26 score bawkin Jalen Brunson chuan point 20 a score ve bawk.