Abstinence: Insumna
A pawimawh leh laimu ber chu pasal neih hmaa mipat hmeichhiatna hman loh hi a ni a, hei hian tleirawl laia naupai (sâwn pai) tur a venghim. Nu leh pate hian an fate enkawl tur atan zirtirtute emaw tu tute emaw chunga innghat tawp lovin ‘sex education’ ah phei chuan sikul-a an zir ringawta innghah a fel fai lova, mahni pawhin uluk taka zirtir a, hrilhfiah a pawimawh hle.
An sawi fo, khap a piang hi tih a châkawm thin. Mahse, a hnu lama nghawng lo thleng tur leh a pawi dan tur hi damchhung khawih thei thil a ni lawi si. Hmâ taka mipat hmei-chhiatna hman hi STD leh HIV/AIDS thlenga kai hlauh-awm tak a ni thei a, kawng engkima mahni inthununna vawn tlat hi hahdamna a ni a, himna pawh a ni.
Awareness: Inhrilh hriatna
Insum theih lohna emaw loh theih lohvang te a nih chuan fimkhur taka invenna hi naupai lohna kawng pakhat a ni a. Sap ram han ti leh mai ila, nu leh pa tam tak te khuan an fate hnenah indanna damdawi hman dan (Contraception methods) hi an mahni ngeiin an zirtir a, an hrilh hria a, doctor emaw tu tute emaw chungah an innghat ngai lo.
Birth control leh sex chungchanga i hrilh khan he-tiang lama inhmang turin i fate kha i fuih emaw i nawr kal tihna a ni reng reng lo. A hun takah hrilh theih tum la, inpawh taka sawi ho ang chi te neih fo a tha bawk.
Abortion: Nau tihtlak
Nau a ken tawh a, pai chhunzawm tumna a awm loh bur chuan nau tihtlak mai loh chu kawng dang a awm lem lova, case tam takah chuan tleirawl te hi sum leh pai chungchangah te rilru puitlinna kawng atang leh thil dang dang atanga thlirin fa enkawl thei dinhmuna ding an ni loh zia hi a lang fo thin a, a luhai thlak hle.
Adoption: Fa lak
Hei pawh hi kawng dang awm leh chu a ni a, mahse engemaw damdawi lam thiam-na atanga thlira nau tihtlak remchan lohna leh hlauhawm ang chi hi a awm fo thin. Mithiam-te rawn a pawimawh dawn a, ngaihtuahna fim tak nena hmalak a tul.
Nau tihtlak a remchang lova, engemaw vanga hrin ngei a duh bawk si chuan naute hriselna atan a paitu nu hian kawng hrang hranga a inluk lehzual a ngai dawn tihna a ni. India ram angahte chuan pasal nei lova hmei-chhiain nau a pai a nih chuan rilruhahna leh harsatna namen lo a tuar nghal thin a, chhung lam leh pawn lam atanga nawrna leh vauna ang chi te pawhin a hmuak fo thin.
An hringnunah damlamna nasa tak a lo awm nghal bawk a, puitling tak tak dinhmuna ding thei si lovin puitling taka khawsa leh awm turin a inpuahchah a lo ngai a, taksa thang lian ve si, mahse rilru lam sawngnawi tak chungin hringnun kawng chhuk chho tak a zawh a lo tul a, a rap-thlak em em a ni.
Tarlan fo tawh angin, tleirawl laia naupai lo tur chuan inhrilhhriatna leh inzirtirna lamah hmasawn a ngai a. Nu leh pate tan, fate nena inkar boruak a that a pawi-mawh a, inrintawnna chungah innghat pumhlum ngam bawk se, chu chu thil tul leh mamawh pawh a ni.
Birth control hman dan zirtir te, sex education chung-chang khunkhan taka sawi pui te hi i tihtur leh mawhphurhna a ni. Ngaihthahna leh ngaihsak lohna avangin i fa mai ni lo, nang leh i chhungte ngei ngei khan an tuar thei.