President Joe Biden chuan North Korea-in coronavirus hri leng darh an tawrh mek laia United States-in a invenna damdawi pek tuma a dawrna chu a la chhang lo tih a sawi.
North Korea-ah hian mi maktaduai 2.5 dawnin ‘khawsik’ an tih mai chu an nei mek a, ram pumah inkharkhip an kalpui bawk tih an ram sorkar chanchinbu chuan a tar lang.
Hri kai leh kai lo endik a tlem em avang leh invenna damdawi an neih bawk si loh avangin mi tam tak dinhmun a derthawng hlea ngaih a ni.
Biden-a chuan South Korea-a a zin meknaah thuthar lakhawmtute a kawmnaah North Korea an dawrna hi a sawi.
“Vaccine kan pek theih thu kan hrilh tawh a, North Korea chauh pawh ni lovin China hnenah pawh, a tul anga che chhuak turin kan inpeih vek bawk,” tiin Biden-a hian South Korean President Yoon Suk-yeol nena thuthar lakhawmtute an kawmnaah a sawi.
“Chhanna erawh kan dawng lo,” a ti zui.
Inla hrang tak, North Korea hian a hma pawhin khawvela invenna damdawi sem rualna, Covax hnuaia pek tumna leh South Korea atanga pek ve tumna chu an lo hnar tawh.
Ramri an khar chu Covid lakah an him phah niin an insawi a; mahse, mi thiamte chuan tuna an hriat chhuah hma pawhin hri kai chu an awm nual tawh an ring tho.
Sorkar chanchinhu chuan hri laka invenna leh inenkawl nan herbal tea, tui chi al leh painkiller an tih, ibuprofen te chu a tha niin an tar lang a. Hetih lai hian an hruaitu, Kim Jong-un chuan damdawi lama thuneitute chu an damdawi dah khawl sate sem darhnaah hma an la tha tawk lo niin a sawi.
China pawh tunah hian inkai awlsam tak, Omicron variant an la thunun thei lo zel a, mi maktaduai eng emaw zat chu inkharkhipna hnuaiah an la awm mek.
North Korea biak duhna
South Korean khawpui, Seoul-a thuthar lakhawmtute a kawmnaah hian President Biden chuan North Korean hruaitu, Kim-a chu boruak tha tak hnuaia kawm a duh thu a sawi.
“Inbiak hi aniin a tih tak tak leh rilru inhawng taka a tih leh tih lohvah a innghat a ni,” a ti.
Biden-a’n a thlak tak, Donald Trump-a khan Kim-a hi Singapore-ah kum 2018 khan a bia, hei hi ram hnih hruaitu inbiaka hriat reng hlawh tur a ni a. US president zinga North Korea ram leilung rap hmasa ber niin a kum lehah a lut bawk.
Kum hnih hnuah Kim-a hian US nena inkungkaihna tha neih chu eng nge tulna a awm tih sawiin an inkar a tha lo thar leh.
President Biden-a leh South Korean president inbia chuan North Korea lian zel tur lo dan nan hian America-in a ralthuamna thawh chhuahpui mai pawh tha an ti a, sipai nunchan zir pawh tam zawk neih ni se, hei hi helai bawra buaina awm thei vengtu atan an ti a ni.