Instagram kaltlangin LIVE a tum ve em em a, a’n LIVE dawn ta cheng a, Instagram lamin an block hmak bawk si.. Madonna a hawi hai hle.
Queen of Pop hian tunhnai khan thlalak sexy leh hmuh nuam lo nia sawi a post vangin ‘warning’ pek a lo ni tawh. Ani lahin thuchiang mumal tak hre hawk lo.. nimin piah khan LIVE tumin a hawng a, heti ang hian message a lo lut ta hlawl mai a ni.
Mak a ti a, awih harsa a ti hle. Inbarakhaihna duhawm loh ber te zingami chu Madonna hian a tawnbaw chiang hle. He platform atang hian error a dawng khauh mai a, message chhiar hrehawm takin a umzui bawk.
Heti ang hian:
Blocked from Sharing Live Video
Post from your account have recently been removed for going against our Community Guidelines. So live video sharing has been temporarily blocked’ tiin
Instagram-in LIVE phal lo mah se, kum 63 mi Madonna hi a thinrim chiam lem lova, boruak zangkhai zawngin a la hlauh thung. “Eng thil nge ni ta? Ka nunah hian thawmhnaw tam tak ka hak awm pawh ka hre si lo.. Sawi ngaihna pawh a awm lo,” a ti.
A team member te’n thil fel lo leh dik lo a awm dah lo’ng maw, tiin an enfiah vat vat na a, awmzia a nei lo. A mah ngei pawhin live session neih ngei tumin a hmet kual ve sek bawk tak na a, Instagram Inpuin an block phui hmup bawk si a, khua a var lo.
INLAICHINNA TICHHIA
Hetih lai hian, social media hman tangkai a pawimawh rualin, kawng lehlama harsatna hrang hrang a thlen dan te hi Madonna hian a hrechiang hle.
Madonna hian a fate hman tur phone a lo pe hman thawt thawt chu tlaikhaw hnu-ah a inchhir a, fate nena inkara inlaichinna-in a tawrh phah, a ti.
A fate- Lourdes (25), Rocco (21), Dave & Mercy (16) leh Esther & Stella (9) te a nei mek a, a upa lam te’n phone an hum fur tawh a, fate nena inlaichinna tichhetu-ah phone chu a mawhphurtu ah a puh lo thei lo.
“Kum 13 mi lek an nih laia phone ka lo pa kha ka tisual takzet. Hemi hnu hian kan inlaichinna in a tawrh phah nasa hle a, an nun-a thil pawimawh leh hmun pawimawh tak a luahchhoh nghal mai avangin a pawi ta hle a ni.
“Mobile Phone an neih hnu hian midang nen an inkhaikhin pah nasa hle a, hei taka hi an thanlen zel nan thil tha lo tak a ni,” a ti.
Hetih lai hian a fanu lian ber Lourdes chu a rin phak baka talent nei tha a nih thu a sawi a, amaherawhchu, social media leh hausakna hian a duhzawng leh tuizawng a buaipuina ah a tithuanthu nasa hle, a ti bawk.