NCP chief Sharad Pawar chuan Maharashtra-a Rajya Sabha bial ruk inthlan lo awm turah Shiv Sena-in Sambhajiraje Chhatrapati emaw, mi dangte emaw pawh thleng se an thlawp tur thu a sawi.
Pawar-a hian Inrinnia Pune-a Brahmin pawl nena an inkawm hnuah thuthar lakhawmtute hnenah a sawi.
Maharashtra atanga Rajya Sabha member paruk — Piyush Goyal, Vinay Sahastrabuddhe leh Vikas Mahatme (BJP vek), P Chidambaram (Congress), Praful Patel (NCP) leh Sanjay Raut (Shiv Sena) te hun chu July 4 hian a tawp dawn a ni.
June 10-ah a thar thlan tura ruahmanna siam a ni a. BJP chuan MLA an neih dan atanga chhutin bial hnih chang thei tur an ni a. Rorel lai tangrual pathum – Shiv Sena, Congress leh NCP chuan pakhat theuh an chan hmel bawk a. Bial dang pakhat la awm chu inchuh ber tura ngaih a ni.
Sambhajiraje-a hi Kolhapur lal chhungkaw zinga mi niin Chhatrapati Shivaji Maharaj thlah kal zel a ni a, tun hmain ram rorelna in sang zawkah hian president-in member a ruat zingah a lo tel tawh thin.
Tun hnai khan Rajya Sabha inthlan lo awm tur chu independent-a a chuh ve tur thu leh party zawng zawngte chu amah thlawp turin a lo sawm tawh.
Inthlan chungchang an zawhnaah Pawar chuan, “Kum hnih liam taah khan Rajya Sabha-ah seat hnih kan duh thu kan sawi a, kan chang a. Tun tumah erawh seat khat chauh kan chang ang,” a ti.
“Kan candidate kan thlawp bakah chuan a dang chu Shiv Sena-in an dintir apiang a ni mai. Sambhajiraje emaw, mi dang emaw pawh an ni thei,” tiin NCP chief hian a sawi.
Shiv Sena hruaitu thenkhat chuan Rajya Sabha inthlan lo awm turah hian candidate pahnih an nei dawn tih an lo sawi tawh a. Chhatrapati-a hi a tel dawn em hriat a ni rih lo.