Real Madrid in an rim a, amah pawhin Spain lam a hawi thu a zep lo. Nimahsela Inrinni khan Kylian Mbappe chuan Paris a cham a thlang a, French champion lai hnenah kum thum contract lian tha tak mai a ziak.
Kum 23 mi hi tun season zawh a contract hmang zo tur a ni a, April thla khan Spanish club nen thuphunga inremna an nei tawh niin an ngai.
Sum tam zawk nen PSG in cham tura an sawmna chu a tawpah erawh a pawm ta zawk a, kum 2025 thleng contract thar a ziah avangin Spanish football a league sang ber La Liga thuneitute an lungawi lo hle.
Chiang zawkin
Spanish football expert Guillem Balague chuan Real Madrid leh Mbappe te hi kumtir atanga an inbiak a thian hnuah thuphungin inremna an nei a niin a sawi tawh.
PSG hian thla hmasa khan a tawp nan Mbappe hi an hnena kum hnih dang tal cham tura hmin tumin Euro maktaduai 150 pek belh an tum thu a darh.
Paris St-Germain hian eng ang zat tak nge an pek dawn a, an inremna eng ang tak nge tih puanzar ni lo mahse hmun thenkhata tarlan dan angin Mbappe hi khawvela footballer hlawh hnem berah an siam.
Contract a ziah avangin Euro maktaduai 150 signing bonus an pek dawn bakah kar khatah Pound maktaduai 1 dawn an hlawhtir dawn a, PSG a contract a hman zawh taka a hlawh let an hlawh tir dawn.
Hei chauh hi a la ni lova, an club sumdawnna kawnga a hming hmanna atangin 60% a chang dawn a. Goal a bonus leh Ballon d”or leh Champions League bonus a awm ang.
Hei bak hi a la awm cheu a, Mbappe hi PSG hotute chuan an team din dan leh player lei chungchangah a remtihna an la thin dawn niin an sawi a. Hetiang a nih vang hian an sporting director Leonardo chu an ban dawn a, head coach Mauricio Pochettino dinhmun pawh a him lo niin mi tam takin an ngai.
Kum 2017 a AS Monaco atanga PSG zawmtu Mbappe hian season nga chhungin Ligue 1 title vawi li a lakpui thei a. Tun season-ah PSG tan game 35 khelin goal 28 a khung bakah assist 17 a nei tawh.
Mbappe chuan, “Ka pianna ram, ka seilenna leh hlawhtlinna tam tak ka lo neih tawhna France-ah ka inkhel zel tur hi ka hlim a. He club hian inelna sangah hlawhtlinna a neihna turin theihtawp a chhuah thin a, hetianga tum sang tak nei club-ah hian hma ka sawn zel dawn tih ka hriat avangin thutlukna ka siam.” tiin a sawi.
La Liga an lawm lo
Mbappe-a thutlukna avangin Spanish football lam an lawm lova. UEFA bakah French leh European Union hnenah an zualko.
Real Madrid chauh ni lova La Liga an lawm loh chhan hi Spanish football in star player an neih chuan sum a ken tel tur an hmuhlawk vang a ni a. Tunhnaia sumdawnna lama intlansiakah Spain in England bakah infiamna dangte a sum lut an phak loh em avangin tan an la nasa hle.
La Liga chuan thuchhuah siamin, “European football in nghet taka sum a kalpui dan ti derthawng thei a ni a. Hetiang inremna ziah hi football tan thil hlauhawm a ni a, sum dinhmun a nghawng thui a, hna tam tak chan theihna khawp a hlauhawm a nih bakah kan infiamna hlutna tihniam thei a ni. Europe huap inelna ah chauh ni lovin tualchhung league thlengin a nghawng thei.” tiin an sawi.
La Liga president Javier Tebas hi PSG leh Manchester City ten nasa taka sum an sen \hin duhlotu langsar tak a ni thin a. “PSG hian tunhnaia season belhkhawmah Euro maktaduai 700 an hloh a, Euro maktaduai 600 vel hlawha an sen laia hetianga an ti thei hi football zah lohna a ni.” tiin a sawi a. Tun thla a Ligue de Football Professionnel (LFP) in an zirchiannaah PSG hain season hmasa khan Euro maktaduai 224.3 vel an hloh.
UEFA hnuaia Financial Fair Play danah club-ten sum hman theih zat khuahkhirh dan a awm chunga PSG president Al-Khelaifi-a’n European Club Association leh UEFA executive member ni chunga dan a palzut reng thei chu La Liga lam hian an sawisel.