- Lallunghnema, Charity Lodge
Consumer Huang min lo hlutsaktute in za vaiin chibai tha ber ka buk a che u.
Mi tam takin ka Huang min lo chhiarsak thin a.Chhiartu pawh in pung zel a.Hlawkpuitu pawh in lo awm belh zel tih thu te chu ka lo hre thin a.Ka lawm hle mai!Thlamuanthlak pawh ka ti pah reng!
Chhiartuten in thil lei leh hmanna kawnga harsatna in neih chuan min han phone zel mai ula,kan beiho zel dawn a ni.Tin, ka YouTube channel pawh a thang ve zel a,subscriber pawh ka nei nial nual a ni.Vijayawadha khawpuia Dr Murthy,Convener Consumer Advocacy Group hian Channel a nei ve a,a active hle.Mahse, ani aiin subscriber ka ngah zawk rih.Ani hi kum 78 mi a ni mek a.A la viak tha hle mai.Ka tluk lo hle a ni
He thu ka buatsaih lai hian Pu R L Rinawma IRS.(retd) thuziak (Pdf) ka hmuh chu ka han keu thuak thuak a.MAU HLUTNA KHURPUI tih a ni a.He lama chak zawka hma la tura Mizoram Sawrkar a fin chhuahna paper a ni ber mai a.Han chhiar hian a bengvar thlak bakah mau sawngbawl hi Mizoram dinchhuahna tur a nih zia a hriat fiah theih hle a ni .Sawrkar pawh hian a ngaih pawimawh ka beisei a ni..Mizorama kan maute hi kan hmang tangkai tam lo hle a,tih chereu mai mai a tam hle ; kan la hal ang duai duai a!A mawl thlak lua a ni.A uiawm tak zet bawk.
Consumerism (a movement that protects the interests of buyers of goods and services) leh Economics hi a insi tlat a,then hran theih pawh a ni lo.Consumer issue a tam chuan mipui economy a thang tihte paw’n a sawi theih awm e.Kan sawi thin tawh angin mitin hi consumer kan ni vek a.Thil kan lei a,pawisa senga kan thil hmanah khan consumer kan nih zel avangin kan thusawi pawh hi a theu neu lo hle a ni.Ram Economy sawi nghingtu bul ber chu keini Consumer-te hi kan ni.Chumi rual chuan thil lei leh hmanna a harsatna neih pawh inhre lo khawp a mawl hi a awm theih bawk.Chuvangin hmasawnna kawnga chak zawk a ke pen tur chuan consumer activity hi kan tih tam a ngai a ni.Sum dik taka hman leh felfai taka thil lei a nih theih nan kan society pumpui hi kan harh chhuah a ngai a ni.
Thil man to leh sang lutukte chu mi thenkhatin an vei em em laia mi thenkhatin eng a mah a , an lo ngaih loh hian chak taka hma lak a har em em a.Consumerte zingah tanrualna leh thawhhona tha a awm thei thin lova.Sumdawng leh Dawrkaite tan thil sual tih na kawng kan hawnsak tihna a ni.Mi thenkhatin MRP an vei em em laiin mi thenkhatin MRP aia sanga thil hralh leh zawrh an sim duh chuang si lo.
Chutih rualin Consumerho zinga mi chuk lak, hma lam leh hnung lam thlir nachang pawh hre lo te chuan an hmuh apiang engmah ngaihtuah peih lovin an lei pawp pawp a.A tawpah an mangang leh si thin.!
Consumer-te hian kan dikna leh kan chanvote hi kan chan theih nan mi thahnem ngai leh thuneitute chuan kawng hrang hrangin hma an la reng a.Mizo mipuite hi hrilh fiah ngai, zirtir mamawh kan ni.Heng Essential Commidity buhfai,gas etc,te hi a dan ang taka pek chhuah a nih theih nan Consumer Union chuan kum 20 chuang kal ta atang khan a lo bei tawh a. LP Gas Home Delivery phei chu a sak talh mai!.Aizawl Veng pakhatah chauh tihpuitlin a la ni a.Pawl hruaitute leh Sawrkarin hma an la chung pawh hian mipui kan ngaihsak tha duh lova.Kan la inhawn that tawk loh avangin thil tih a har em em mai.Mipuiin kan tana tha tur pawh hi kan um zui tha peih lo ni berin a lang a ni.Kan tana tha tur pawh hi kan hre lova,Kan tan a awlsamna tur hi kan ngaihtuah duh lo ni berin ka hria a ni.
Tun lai hian Aizawl khaw chhung hmun hrang hrangah awareness campaign neih mek a ni a.Eng nge kan an dawn ka hre lo.Tun ang hun digital age -ah hian Gas la tura tlangau tirh leh intlar hi kan inhmeh tawh lo.LP Gas Control Order kan chhiar chuan LP Gas hi home delivery tur a ni bur mai.Mshse,Kan mawl em avangin home delivery kan ti thei dawn leih leih chauh.Hetiang em em a, home delivery tih a harsat chhan hi Gas Distributorte vang a ni ngawr ngawr law,kan mawl vang a ni ber.Tlem lai deuh khan Veng pakhat chuan Gas Home Delivery hi an duh lo tih thawm ka hria a.Mak ka ti tawp thei lo. Vengah dang pakhatah pawh Local Council Chairman nen a Gas Home Delivery chungchang kan sawi naah chuan, Chairman chuan mipuiin an duh lo a ni lawm ,ni!? a ti daih! Mak ka ti ,nawn awn awn a ni! !Gas Home Delivery hi lo hnar chi pawh a ni em ni?Mahse,awareness campaign a tul tlat si!he kristian ramah hian!!Consumerte kan tanrual loh chuan Home Delivery hi a hlawhchham ngei dawn a ni.Consjmerte kan tanrual erawh chuan a hlawtling ngei bawk ang. Consumerte kan tanrual loh pheng avang hian thil tih a harsa vel vek ringawt mai a ni.
Gas leak lak loh tur,Gas tui tling lak loh tur! Gas buktir zel tur,Cash memo lak zek tur,MRP aia sangin thil lei loh tur tia Sawrkar leh Activistte an au chhuah mawlh mawlh laiin mi thenkhat chuan duham takin heng kan sawite hi an palzut bawrh bawrh thin Hengho hi mipui hmelma an ni tih ka sawi duh a ni.Thil lei thleng (return) chungchangah pawh mi thenkhat chuan a thleng theih tih avangin awmze nei lo takin Activist-te an pan thin a Tan chhan mumal nei lovin an thil leite chu an duh ang a nih loh avang ringawtin thleng an tum thin. Dawrkai leh sumdawng thenkhat lahin, “Thil lei tawh kan thlengtur ngai lo,” an lo ti tum hrang ve a.Buaithlak tak a ni.A buhna takah chuan hetianga Consumer Protection Act a lo awm hnu ah hi chuan thil hralhtu leh tha leh zung petu(service provider)te hi an Sapa tal thiang tawh lo a ni.He Act&Rules awm hma hauh pawh hian Thil leitute vengtu Dan eng emaw zat, entir nan Essential Commodities Act,1955 etc a awm a ni.Consumer Protection Act hi chuan kiltin a hawk a ni ber mai.
Dan hriat loh hi ngaihdam theihva ni lo.Dan hriat loh hi tuarna a ni.Consumer Right hriat loh phei hi chu nitin a tuarna a ni a.Mimal tuarna leh chhungkuaa tuarna a thlen thin.
Khatia Aizawl District Consumer Forum-a Member ka han nih ve chhung khan case chi hrang hrang kan ngaihtuahin kan ching fel thin a.Ka sawi tawh thin angin nitin case 10 chuangte kan chai thin.Member pakhat Ni ve tura ka hna ka zawm ni khan MCU hruaituPute:P.Lalupa,Thanglura ,VLRawna,Ngursailova Sailo(ka Pu zawn) leh *Zotlangthangate khan min tawiawm a.Thingpui kan inhova,thlalak hona kan nei bawk.Tichuan,President charge ka la nghal a.Ka u Hawla’n a hna a zawm khan President charge chu ka pe ve leh ta a ni.Pu Hawla,President leh hmeichhe aiawh Member Pi Rohminglianite nen khan kan thawkho tha hle mai a.Lungrual takin complaint kan ngaihtuahho thin a ni.
Kekawr thui dik lo chu:
Tum khat chu Aizawl DC pisaa thawk pakhat hi Forumah khan a lo lang nawlh mai a.Polythene bag hian kekawr tlawn thui thar a lo paipawn niin!Thil awmzia Kan han zawh chuan a kekawr thuitir kha a lo dik lova,a tawt bakah a lo inpai vet hle mai.Kan han haktir a,a ha tha hlei thei lova.Nuih a za duh khawp,mahse,tumah kan nui ngam lo!Complainant hian puan thuitu chu a dang pe mai turin a ngen a.An inbe rem thei lo kha niin.Tichuan, ngun taka ka ngaihtuah hnuin puan thuitupa hnenah chuan a thar thuisak turin kan sawi felsak ta a ni.Hmun a awh tam deuh dawn avangin a kipa kawiin ka sawi lo mai a ni.Puan thuitu hi service provider a ni a,puanthuitirtu hi service leisaktu a ni.Consumer Protection Act,1986-in a tarlan deficiency in service tan chhanin kan tih felsak ta a ni. Khang hun lai khan complaint nuihzat thlak tak tak ngaihtuah tur a awm thin. Nau pai tawh lo tur a inzaitir ( tuebectomy) nau pai leh tlat case te kan nei. Pheikhawk thar ni si,vawi hnih khat chauh bun a,a khing lehlam bung ta hmawk case-te kan ngaihtuah thin.Thil nuihzat thlak, nuihpui ngam si loh a awm zeuh zeuh!Tun a Aizawl Dist.Consumer Commission a Pu VL.Mawia,President leh a hote hi chuan nuihpui bawk bawk tur complaint an neih ve loh ka beisei hle.