Mizoramah petrol a la vâng chhunzawm zel a, a lei tura online hmanga supply department-a permit dil an thahnem lutuk avangin dilna lut lo approve turin website a buai phah a, permit pek chhuah kawngah harsatna a awm leh zel.
Assam chhunga ruahsur nasa avanga tui lian leh lei minin rel kawng leh kawngpui a tichhia a, hei vang hian kar khat chuang zet Mizoramah petrol chawk luh a mumal tawh lo.
Mizorama filling station hrang hrangin petrol an kawlte a daihzai thei ang bera sem chhuah a nih theih nan petrol lei kawngah sorkarin inkhuahkhirhna a siam a, petrol lei turin supply department-ah permit dil a ngai.
Online hmanga permit dil chu ni khatah mi 10,000 chuang an awm thu Supply Department Director Ramdinliani chuan The Zozam Times a hrilh a, “Permit dil an tam lutuk a, kan website-in a zo leh si lo a, ni khatah vawi tam tak website hi hman theih lohin a buai phah,” a ti.
Website an hman hleih theih loh dan sawi chhunzawmin, “Permit pek phalna rawn lut hi pahnih khat kan han approve a, a chhe leh nghal zel,” a ti a; hei vang hian permit pek chhuah chu a muang lo thei lo tih a sawi.
Hetia petrol lei phalna permit dil an tam chhan chu mipui an chiai vang nia an ngaih thu department director chuan sawiin, permit diltute hian an mamawh vang ai mahin an chiai vang zawkah an ni lam chuan an puh ber tih a sawi a, “An mamawh khawp hi rawn dil mai se kan buai lo tlang tur a nia,” a ti.
Mizoramin petrol tlakchhamna nasa a tawh loh nan inrenchem tlan a tul thu sawi bawkin, May 16, 2022-a Mizorama petrol awm zat chu IOCL lamin ni hnih daih chauhah an chhut laiin sorkarin inkhuakhirhna a kalpui avangin kar khat dawn chu an inpawt fan phah thei niin a sawi.
Rel kawng leh kawngpui chhia avangin petrol chawk luh chu mumal lo mah se sorkar hmalaknain tam tham vak lo chu phurh luh reng a ni tih a sawi a, “Guwahati-a petrol phur tanker-te an rawn thleng zel a, petrol la tura thang mekte pawh an awm,” a ti.
Guwahati atanga petrol chawk luh a awm reng a, chungte chu inrenchem taka semzai a nih zel chuan harsatna lian tham tak Mizoramin a tawh loh an beisei tih a sawi.
Assam-in khuarel chhiatna an tawh avangin Mizoramah petrol vâng mah se diesel erawh khawl khawm sa a tam a, diesel a vân ve phah lo tih Ramdinliani chuan sawi bawkin, eirawngbawlna gas-ah pawh harsatna a awm loh thu a sawi bawk.
Sorkar lamin petrol a vân zual zel loh nan an theih ang anga hma an lak mek laiin Mizoram chhunga filling station tak zawkin khawl khawm sa an nei mang tawh lo a, free sale tur nei an awm mang tawh lo bawk a ni.
The Zozam Times-in Aizawl khawpui chhung hmun hrang hranga petrol pump a tlawh a kualnaah free sale tur an nei mumal tawh lo va, supply department pertmit pek leh coupon neite hnena hralh tur nei erawh an awm nual.
Filling station thenkhat enkawltute chuan petrol an kawl mek chu litre 5,000 hnuai lam a nih tawh thu an sawi hlawm a, petrol phurh thlen thar a awm lawk loh chuan hralh chhuah tur an nei lo thuai dawn tih an sawi a. Diesel-ah erawh buaina a awm lo va, an free sale zel thei tih an sawi bawk.
Hetihlai hian Inrinni khan Aizawl khawpui chhunga filling Station thenkhatin petrol chu a duh apiang lei theih turin an zuar a, a lei tura lirthei intlar a tam em avangin traffic jam a siam nasat phah hle a ni.